ക്രൂഡ് ഓയിൽ വില കുറഞ്ഞേക്കും; പ്രതീക്ഷയോടെ രാജ്യം

കൊച്ചി∙ ക്രൂഡ് ഓയിൽ ഉൽപാദനം വർധിപ്പിക്കാൻ ഉൽപാദക രാജ്യങ്ങളുടെ സംഘടനയായ ഒപെക്, ഒപെക് ഇതര രാജ്യങ്ങൾ (ഒപെക് പ്ലസ്) തീരുമാനിച്ചതോടെ രാജ്യാന്തര വിപണിയിൽ വില കുറയാൻ സാധ്യതയേറി. ക്രൂഡ്ഓയിൽ വില ഇന്നലെ ബാരലിന് 73 ഡോളറിൽ നിന്ന് 71 ആയി.

വില ഇനിയും താഴ്ന്നാൽ രാജ്യത്ത് ഇന്ധനവില കുറയ്ക്കാൻ സർക്കാരിനു മേൽ സമ്മർദം ശക്തമാകുമെന്ന് ഉറപ്പാണ്. 20 ദിവസത്തിനിടെ 9 തവണയാണ് ഇന്ധന വില കൂട്ടിയത്. രണ്ടാഴ്ച ക്രൂഡ് ഓയിൽ വില താഴ്ന്ന നിലയിൽ തുടരുകയായിരുന്നു. ഓഗസ്റ്റ് മുതൽ ഡിസംബർ വരെ പ്രതിദിനം 4 ലക്ഷം ബാരൽ അധികം ഉൽപാദിപ്പിക്കാനാണ് ഒപെക് തീരുമാനം.