ആദായമില്ലാതെ നിക്ഷേപം; ബാങ്ക് നിക്ഷേപ പലിശ 5%, വിലക്കയറ്റം 5.3%

ബാങ്കിലെ സ്ഥിര നിക്ഷേപത്തിന്റെ പലിശ ഉപയോഗിച്ചു ജീവിതച്ചെലവുകൾ നേരിടുന്നവർക്ക് വിലക്കയറ്റം ഇരുട്ടടിയാകും. പലിശ നിരക്കിനെക്കാൾ കൂടുതലാണ് ഇപ്പോഴത്തെ വിലക്കയറ്റത്തോത്. ഇക്കൊല്ലം 5.3% വിലക്കയറ്റമെന്നാണ് റിസർവ് ബാങ്ക് ഓഫ് ഇന്ത്യ പ്രവചിക്കുന്നത്. ബാങ്കുകളിലെ സ്ഥിരനിക്ഷേപ പലിശയാകട്ടെ 5 ശതമാനത്തിന്റെ പരിസരത്തും. വിലക്കയറ്റത്തോതും പലിശനിരക്കും തമ്മിലുള്ള വ്യത്യാസമാണ്, നിക്ഷേപത്തിൽനിന്നുള്ള യഥാർഥ ആദായം. പലിശ 5%, വിലക്കയറ്റം 5.3% എന്നിങ്ങനെ ആകുമ്പോൾ യഥാർഥ ആദായം അഥവാ യഥാർഥ പലിശ –0.3% (നെഗറ്റീവ്).  

ഒരു വർഷ കാലാവധിയുള്ള നിക്ഷേപങ്ങൾക്കാണ് 4.9%, 5% എന്നിങ്ങനെ വിവിധ ബാങ്കുകൾ വാഗ്ദാനം ചെയ്യുന്നത്. 2–3 വർഷ കാലാവധിയുള്ള നിക്ഷേപമാകുമ്പോൾ പലിശ നിരക്ക് 5.1%, 5.15% എന്നിങ്ങനെ ഉയരും. എന്നാലും വിലക്കയറ്റത്തോതിനെക്കാൾ താഴെയാണിത്. അതേസമയം, കേന്ദ്രസർക്കാരിന്റെ ചെറുകിട സമ്പാദ്യ പദ്ധതികൾ ഇതിനെക്കാൾ മികച്ച ആദായം നൽകുന്നു. 5.5% മുതലാണ് ഇവയുടെ പലിശ നിരക്ക്. 

കോവിഡ് മൂലമുണ്ടായ സാമ്പത്തിക പ്രതിസന്ധി മറികടക്കാൻ വായ്പയുടെ പലിശ നിരക്കുകൾ താഴ്ത്തി നിർത്തേണ്ടതുണ്ടെന്നും ആ സാഹചര്യത്തിൽ നിക്ഷേപ പലിശ താഴുന്നത് സ്വാഭാവികമാണെന്നും സാമ്പത്തിക വിദഗ്ധർ പറയുന്നു. മ്യൂച്വൽ ഫണ്ട്, ഓഹരി വിപണി തുടങ്ങിയവയിലേക്ക് നിക്ഷേപകർ നീങ്ങുന്ന പ്രവണത ഇപ്പോഴത്തെ സാഹചര്യത്തിൽ തുടരും. വിലക്കയറ്റത്തോത് കുറയുകയും ബാങ്ക് പലിശ ഉയരുകയും ചെയ്യുമ്പോഴേ ഈ നില മാറൂ. ബാങ്കുകളിലെ സേവിങ്സ് ബാങ്ക് നിക്ഷേപ പലിശനിരക്ക് 3.5 ശതമാനത്തിനടുത്താണ്.

കഴിഞ്ഞ മാസം വിലക്കയറ്റം കുറവ്

സെപ്റ്റംബറിൽ വിലക്കയറ്റത്തോത് 5 മാസത്തെ താഴ്ന്ന നിലയിലെത്തി. 4.35% ആണ് ചില്ലറവ്യാപാരവിലകൾ അടിസ്ഥാനമാക്കിയുള്ള വിലക്കയറ്റം. ഭക്ഷ്യോൽപന്ന വിലകൾ താഴ്ന്നതാണ് മുൻകൊല്ലം സെപ്റ്റംബറിലെക്കാൾ വിലക്കയറ്റതോത്ത് കുറയാൻ മുഖ്യകാരണം. ജൂലൈ–സെപ്റ്റംബർ കാലയളവിൽ ശരാശരി 5.1% വിലക്കയറ്റത്തിനാണു സാധ്യതയെന്ന് റിസർവ് ബാങ്ക് ഓഫ് ഇന്ത്യ പറഞ്ഞിരുന്നു.