കോവിഡിനു ശേഷം ആദ്യമായി വരുമാനം 5 കോടി കടന്ന് കെഎസ്ആർടിസി

തിരുവനന്തപുരം∙ കെഎസ്ആർടിസിയുടെ പ്രതിദിന വരുമാനം കോവിഡിന് ശേഷം ഇതാദ്യമായി 5 കോടി രൂപ കടന്നു. കഴിഞ്ഞ തിങ്കളാഴ്ച മാത്രം 5.28 കോടി രൂപയാണ് വരുമാനം. ശബരിമലയിലേക്ക് ഉൾപ്പെടെ 3445 സർവീസാണ് അന്നു നടത്തിയത്. പമ്പയിലേക്കു നടത്തിയ 66 സ്പെഷൽ സർവീസുകളിൽ നിന്നു മാത്രം 6,51,495 രൂപയാണു വരുമാനം ലഭിച്ചത്. 2020 മാർച്ചിനു ശേഷം ആദ്യമായാണ് 5 കോടിയുടെ വരുമാനം. 2020 മാർച്ച് 11 ന് ആണ് അവസാനമായി കെഎസ്ആർടിസിക്കു ദിവസ വരുമാനം 5 കോടി രൂപയ്ക്കടുത്ത് ലഭിച്ചത്. അന്നു 4572 ബസുകളാണു സർവീസ് നടത്തിയത്.