പ്രവാസി ഭദ്രത–മൈക്രോ സ്വയം തൊഴിൽ വായ്പ കേരള ബാങ്ക് വഴിയും; 5 ലക്ഷം വരെ

തിരുവനന്തപുരം ∙ തിരിച്ചെത്തിയ പ്രവാസികൾക്ക് ചെറുകിട സംരംഭങ്ങൾ തുടങ്ങുന്നതിനു നോർക്ക റൂട്സ് നടപ്പാക്കുന്ന പ്രവാസി ഭദ്രത–മൈക്രോ സ്വയംതൊഴിൽ വായ്പ കേരള ബാങ്കു വഴിയും വിതരണം തുടങ്ങി. ബാങ്കിന്റെ 769 ശാഖകളിലൂടെ 5 ലക്ഷം രൂപ വരെ വായ്പ ലഭിക്കുമെന്ന് നോർക്ക സിഇഒ അറിയിച്ചു. സംരംഭങ്ങളുടെ മാത്രം ഈടിന്മേലാണു ബാങ്ക് വായ്പ വിതരണം ചെയ്യുന്നത്. 

2 വർഷം വിദേശത്തു ജോലി ചെയ്തു നാട്ടിൽ തിരിച്ചെത്തിയവർക്കാണ് അർഹത. പദ്ധതി തുകയുടെ 25% പരമാവധി ഒരു ലക്ഷം രൂപ വരെ മൂലധന സബ്സിഡിയും ആദ്യ 4 വർഷം 3% പലിശ സബ്സിഡിയും ലഭിക്കും. കൂടുതൽ വിവരങ്ങൾക്ക് കേരള ബാങ്ക് ശാഖയിലോ നോർക്ക റൂട്സിന്റെ 18004253939 എന്ന ടോൾ ഫ്രീ നമ്പറിലോ ബന്ധപ്പെടാം.