യുഎഇ കരാർ അന്തിമ ഘട്ടത്തിൽ

ദുബായ്∙  വാണിജ്യ-വ്യാപാര ഇടപാടുകൾ വർധിക്കാനും രാജ്യാന്തര വിപണിയിൽ കൂടുതൽ നേട്ടങ്ങൾ കൈവരിക്കാൻ സഹായിക്കുകയും ചെയ്യുന്ന ഇന്ത്യ-യുഎഇ സ്വതന്ത്ര വ്യാപാര കരാർ  ലക്ഷ്യത്തോടടുക്കുകയാണെന്നു കേന്ദ്ര വാണിജ്യ-വ്യവസായ മന്ത്രി പീയൂഷ് ഗോയൽ അറിയിച്ചു. കരാർ നടപ്പാകുന്നതോടെ വാണിജ്യ-വ്യാപാര ഇടപാടുകൾക്കുള്ള നടപടിക്രമങ്ങൾ ലളിതമാകും. 

കൂടുതൽ സംരംഭങ്ങൾക്കും തൊഴിൽ അവസരങ്ങൾക്കും വഴിയൊരുങ്ങുമെന്നും വ്യവസായ സംഘടനാ പ്രതിനിധികളുമായി നടന്ന കൂടിക്കാഴ്ചയിൽ മന്ത്രി പറഞ്ഞു. കരാർ ഒപ്പുവച്ച് 5 വർഷത്തിനകം ഇരുരാജ്യങ്ങൾക്കുമിടയിലുള്ള വാണിജ്യ-വ്യാപാര ഇടപാട് 10,000 കോടി ഡോളറിനു മുകളിലെത്തിക്കുകയാണു ലക്ഷ്യം. വിവിധ സേവനങ്ങളുമായി ബന്ധപ്പെട്ട വ്യാപാരത്തിൽ 1,500 കോടി ഡോളറിന്റെ ഇടപാടും പ്രതീക്ഷിക്കുന്നു.