വീണ്ടും നിരക്ക് കൂട്ടാൻ ടെലികോം കമ്പനികൾ

ന്യൂഡൽഹി∙ സ്വകാര്യ ടെലികോം കമ്പനികൾ വീണ്ടും നിരക്ക് ഉയർത്തിയേക്കും. ഈ വർഷം അവസാനത്തോടെ 10 മുതൽ 12 ശതമാനം വരെ വർധന ടെലികോം നിരക്കുകളിലുണ്ടാകുമെന്നാണ് റിപ്പോർട്ട്. കഴിഞ്ഞ നവംബറിലാണ് അവസാനം നിരക്ക് കൂട്ടിയത്. 25 ശതമാനത്തോളം വർധന വരുത്തിയിരുന്നു. 

വില ഉയർത്തുന്നതോടെ എയർടെലിന് ഒരു ഉപയോക്താവിൽ നിന്ന് ലഭിക്കുന്ന ശരാശരി വരുമാനം (എആർപിയു) 200 രൂപയാകും. ജിയോയ്ക്ക് 185 രൂപയും വോഡഫോൺ–ഐഡിയയ്ക്ക് (വിഐ) 135 രൂപയുമായും വർധിക്കും. ഇക്കൊല്ലം മൊബൈൽ സേവന നിരക്ക് ഉയർത്തേണ്ടിവരുമെന്ന് വോഡഫോൺ–ഐഡിയ (വിഐ) എംഡിയും എയർടെൽ സിഇഒയും അടുത്തയിടയ്ക്ക് സൂചന നൽകിയിരുന്നു.