കയറ്റുമതി 23.52% കൂടി; വ്യാപാരക്കമ്മി റെക്കോർഡ്

മുംബൈ∙ ജൂണിൽ രാജ്യത്തുനിന്നുള്ള കയറ്റുമതി മുൻകൊല്ലം ഇതേ കാലത്തെക്കാൾ 23.52% ഉയർന്ന് 4013 കോടി ഡോളറിന്റേതായി. ഇറക്കുമതിച്ചെലവ് 57.55% കൂടി 6631 കോടി ഡോളർ ആയതോടെ, ഇവ തമ്മിലുള്ള വ്യത്യാസമായ വിദേശവ്യാപാരക്കമ്മി 2618 കോടി ഡോളർ എന്ന സർവകാല ഉയരത്തിലെത്തി. കഴിഞ്ഞ വർഷം ജൂണിൽ 960 കോടി ഡോളറായിരുന്ന കമ്മി ഇപ്പോൾ 172.72% വർധനയാണു രേഖപ്പെടുത്തിയത്.എണ്ണ ഇറക്കുമതി 2130 കോടി ഡോളർ, കൽക്കരി 676 കോടി ഡോളർ, സ്വർണം 274 കോടി ഡോളർ എന്നിങ്ങനെയാണ് ഇപ്പോഴത്തെ നില. ഇവയിലൊക്കെ വൻ കുതിപ്പാണുണ്ടായത്.