ന്യൂഡൽഹി∙ ആഭ്യന്തര ലഭ്യത ഉറപ്പാക്കാനായി കഴിഞ്ഞ മാസം കേന്ദ്രസർക്കാർ വർധിപ്പിച്ച ഡീസൽ കയറ്റുമതി തീരുവ വീണ്ടും കുറച്ചു. 11 രൂപയായിരുന്നത് 5 രൂപയായി കുറച്ചു. ഏവിയേഷൻ ഇന്ധനത്തിന്റേത് (എടിഎഫ്) പൂർണമായും ഒഴിവാക്കി. പെട്രോളിന് ഏർപ്പെടുത്തിയ 6 രൂപ മുൻപ് പൂർണമായും ഒഴിവാക്കിയിരുന്നു. തീരുമാനം ആഭ്യന്തര വിലയെ ബാധിക്കില്ലെന്നതിനാൽ സാധാരണക്കാർക്ക് ഇന്ധനം ലഭിക്കുന്ന വിലയിൽ മാറ്റമില്ല. തദ്ദേശീയമായി ഉൽപാദിപ്പിക്കുന്ന ക്രൂഡ് ഓയിലിനു മേൽ ടണ്ണിന് അധിക നികുതിയായി ചുമത്തിയ ‌17,000 രൂപ 17,750 രൂപയായി വർധിപ്പിച്ചു. രാജ്യാന്തര വിലയിലുണ്ടായ നേരിയ വർധന മൂലമാണിത്.റഷ്യ–യുക്രെയ്ൻ യുദ്ധത്തിന്റെ പശ്ചാത്തലത്തിൽ കയറ്റുമതി വർധിച്ചതോടെ രാജ്യത്തെ റിഫൈനറികൾക്ക് എണ്ണ ലഭിക്കുന്ന അളവിൽ കുറവുണ്ടായിരുന്നു.