രൂപയ്ക്കും വിപണിക്കും ആശ്വാസദിനം

മുംബൈ∙ ഏഴു ദിവസത്തെ തുടർച്ചയായ തകർച്ചയ്ക്കൊടുവിൽ ഓഹരി വിപണിയിൽ ഇന്നലെ ആശ്വാസ ദിനം. സെൻസെക്സ് 1,016.96 പോയിന്റ് കുതിച്ചു. വ്യാപാരത്തിനിടെ 1312.67 പോയിന്റ് വരെ ഉയർന്നു. വ്യാപാരം അവസാനിക്കുമ്പോൾ 57,426.92 പോയിന്റ്. നിഫ്റ്റി 276.25 പോയിന്റ് ഉയർന്ന് 17,094.35 ലും ക്ലോസ് ചെയ്തു.

റിസർവ് ബാങ്ക് പലിശ നിരക്കിൽ 50 ബേസിസ് പോയിന്റ് വർധന വരുത്തിയതും, ജനുവരി മുതൽ നാണ്യപ്പെരുപ്പം ആശ്വാസനിലവാരത്തിലേക്ക് എത്തുമെന്ന് പ്രഖ്യാപിച്ചതും വിപണിയിൽ പ്രതിഫലിച്ചു. അതേസമയം ഹോങ്കോങ് ഒഴികെ  ഏഷ്യയിലെ മിക്കവാറും വിപണികളിൽ തകർച്ച രേഖപ്പെടുത്തി. ഡോളറുമായുള്ള വിനിമയത്തിൽ രൂപ ഇന്നലെ 33 പൈസ നേട്ടത്തോടെ 81.40 നിലവാരത്തിലെത്തി. വ്യാപാരത്തിനിടെ 81.17 വരെ ഉയർന്നിരുന്നു.