മികച്ച തുടക്കവമായി മാൻകൈൻഡ് ഫാർമ

മുംബൈ∙ വ്യാപാരത്തിന്റെ ആദ്യദിനത്തിൽ മാൻകൈൻഡ് ഫാർമയ്ക്ക് 32 ശതമാനം നേട്ടം. ഇഷ്യു വില 1080 രൂപയായിരുന്ന ഓഹരിയുടെ മൂല്യം ആദ്യദിനം വ്യാപാരം അവസാനിച്ചപ്പോൾ (എൻഎസ്ഇ) 1430 രൂപയായി ഉയർന്നു.  20% പ്രീമിയത്തിലാണ് (1300രൂപ) ഓഹരികൾ വ്യാപാരം തുടങ്ങിയത്. ഈ വർഷത്തെ ഏറ്റവും വലിയ ഐപിഒ ആണ് മാൻകൈൻഡ് ഫാർമയുടേത്. രാജ്യത്തെ മൂന്നാമത്തെ വലിയ ഐപിഒയും. 

കഴിഞ്ഞ മാസം നടന്ന 4326 കോടിയുടെ പ്രാഥമിക വിൽപനയിൽ 15.32 ഇരട്ടി ഓഹരികൾക്കാണ് ആവശ്യക്കാരെത്തിയത്. നാഷനൽ എന്‍എസ്ഇയിൽ 3.31 കോടി ഓഹരികളുടെയും ബിഎസ്ഇയിൽ 12 ലക്ഷം ഓഹരികളുടെയും വ്യാപാരം ഇന്നലെ നടന്നു. കഴിഞ്ഞ ഒരു വർഷമായി ഹെൽത്ത്കെയർ മേഖല നഷ്ടത്തിലായിരുന്നെങ്കിലും ഫാർമ കമ്പനികളുടെ മികച്ച പ്രകടനം മേഖലയിലേക്കു നിക്ഷേപകരെ എത്തിച്ചു തുടങ്ങിയിട്ടുണ്ട്. മാൻകൈൻഡിന് നിക്ഷേപകർ നൽകിയ സ്വീകരണം മേഖലയ്ക്ക് വരുംദിവസങ്ങളിലും കരുത്തു പകർന്നേക്കും.