ബിജിഎംഐ ഗെയിം എത്തി കുട്ടികൾക്ക് 3 മണിക്കൂർ കളിക്കാം

മുംബൈ∙ പബ്ജിയുടെ പിന്നീടെത്തിയ പതിപ്പായ ബിജിഎംഐ മൂന്നു മാസത്തെ ‘ട്രയൽ റണ്ണിന്’ ഇന്ത്യയിൽ വീണ്ടും അവതരിപ്പിച്ചു. കേന്ദ്ര സർക്കാർ നിരോധിച്ചിരുന്ന ഗെയിം സർക്കാർ നിർദേശിച്ച മാനദണ്ഡങ്ങൾ പാലിച്ചാണ് വീണ്ടും അവതരിപ്പിച്ചിരിക്കുന്നത്. ഗെയിമിനോടുള്ള ആസക്തി (അഡിക്‌ഷൻ) കുറയ്ക്കുന്നതിനായി സമയപരിധി അവതരിപ്പിച്ചതാണ് പുതിയ മാറ്റം. 18 വയസ്സിൽ താഴെയുള്ളവർക്ക് ദിവസം 3 മണിക്കൂറും 18 കഴിഞ്ഞവർക്ക് ദിവസം 6 മണിക്കൂറും ആണ് പരമാവധി കളിക്കാവുന്ന സമയം. 2021ൽ പബ്ജി ഗെയിം നിരോധിക്കപ്പെട്ടപ്പോൾ ഇന്ത്യയിലെ കളിക്കാർക്കു വേണ്ടി പുതിയ പേരിൽ അവതരിപ്പിച്ച ഗെയിമാണ് ബിജിഎംഐ. പുതിയ ഗെയിം ആപ്പ് ആൻഡ്രോയ്ഡിലും ഐഒഎസിലും ലഭ്യമാണ്.