ആറ് വയസുള്ള ഏക മകന്റെ ജീവൻ തിരിച്ചുപിടിക്കാൻ ഇവർക്കു വേണം 35 ലക്ഷം

കൊല്ലം ∙ കാൻസർ ബാധിച്ചു കണ്ണൂർ മലബാർ കാൻസർ സെന്ററിൽ ചികിത്സയിൽ കഴിയുന്ന ആറു വയസുകാരൻ, മജ്ജ മാറ്റി വയ്ക്കൽ ശസ്ത്രക്രിയയ്ക്കായി സഹായം തേടുന്നു. കൊല്ലം ബീച്ച്റോഡ് മുണ്ടയ്ക്കൽ വെസ്റ്റ് പുതുവൽ പുരയിടത്തിൽ ശ്രീജിത്ത് – രഞ്ജിനു ദമ്പതികളുടെ മകൻ സഞ്ജയ് ആണു കനിവു തേടുന്നത്.

2018 ജൂണിൽ പ്രതിരോധ കുത്തിവയ്പ്പെടുത്തപ്പോൾ കാലിൽ നീരു വന്നു വീർത്തതാണു തുടക്കം. പരിശോധനയിൽ മജ്ജയിൽ കാൻസർ ബാധിച്ചതായി കണ്ടെത്തി. പിന്നീട് തലസ്ഥാനത്തെ ആർസിസിയിലും കണ്ണൂർ മലബാർ കാൻസർ സെന്ററിലുമായി മാസങ്ങൾ നീണ്ട ചികിത്സ. ആറു മാസത്തിനു ശേഷം രോഗം പൂർണമായി ഭേദപ്പെട്ടതായി റിപ്പോർട്ടു വന്നപ്പോൾ മാതാപിതാക്കൾ ഒരുപാട് സന്തോഷിച്ചു. പക്ഷേ, ആ സന്തോഷത്തിന് അധികം ആയുസുണ്ടായിരുന്നില്ല. ഏതാനും മാസങ്ങൾക്കു ശേഷം അസുഖം മടങ്ങിയെത്തി.

ഇനി മജ്ജ മാറ്റിവയ്ക്കൽ അല്ലാതെ മറ്റു ചികിത്സ ഇല്ലെന്നാണ് ഡോക്ടർമാർ പറയുന്നത്. ഇതിന് 35 ലക്ഷം രൂപയുടെ ചിലവു പ്രതീക്ഷിക്കുന്നു. ഈ ശസ്ത്രക്രിയ കണ്ണൂർ തലശേരി മലബാർ കാൻസർ സെന്ററിൽ നടത്താൻ ധാരണയായിട്ടുണ്ട്. ഏക മകന്റെ ജീവൻ തിരിച്ചു പിടിക്കാനുള്ള പരക്കം പാച്ചിലിനിടെ ഈ രക്ഷിതാക്കൾ മുട്ടാത്ത വാതിലുകളില്ല. കരുണ വറ്റാത്ത ഹൃദയങ്ങളിലാണ് ഇനി ഇവരുടെ ഏക പ്രതീക്ഷ. ഫെഡറൽ ബാങ്ക് കൊല്ലം ശാഖയിൽ അക്കൗണ്ട് തുറന്നിട്ടുണ്ട്. 

ബാങ്ക് അക്കൗണ്ട് വിവരങ്ങൾ

• ഫെഡറൽ ബാങ്ക് കൊല്ലം ശാഖ
  
• അക്കൗണ്ട് നമ്പർ: 10190100336228
• IFSC Code: FDRL0001019
• ഫോൺ : 9946757557