Manoramaonline.com no longer supports Internet Explorer 8 or earlier. Please upgrade your browser.  Learn more »

തെറ്റിദ്ധരിക്കേണ്ട, ഇത് റിബേറ്റ്; ഇളവ് അഞ്ചു ലക്ഷത്തിൽ താഴെ വരുമാനമുള്ളവർക്കു മാത്രം

iStock-515452269

ആദായ നികുതി പരിധി 5 ലക്ഷം രൂപയാക്കി ഉയർത്തിയെന്നു പറയുമ്പോഴും യഥാർഥത്തിൽ റിബേറ്റിന്റെ പരിധി ഉയർത്തുകയാണു ചെയ്തത്. നികുതി ഒഴിവിന്റെ പരിധി (സ്ലാബ്) 5 ലക്ഷമാക്കി ഉയർത്തുന്നതിനു പകരം റിബേറ്റ് ഉയർത്തിയതിലൂടെ ഇളവിന്റെ ആനുകൂല്യം 5 ലക്ഷം രൂപയിൽ താഴെ വരുമാനം ഉള്ളവരിൽ ഒതുങ്ങി. 5 ലക്ഷം കടന്നാൽ ആനുകൂല്യം ലഭിക്കില്ല.

ആദായനികുതി ഇളവ് അറിയാൻ ഓൺലൈൻ കാൽകുലേറ്റർ >

87എ വകുപ്പിൽ 12,500 രൂപയുടെ റിബേറ്റാണ് ബജറ്റിൽ നൽകിയത്. നിലവിൽ 3.5 ലക്ഷം രൂപ വരെ 2500 രൂപയാണ് റിബേറ്റ്. 

കണക്ക് ഇങ്ങനെ: 2.5 ലക്ഷം മുതൽ 5 ലക്ഷം രൂപ വരെ 5 ശതമാനം നികുതി. അതായത്, 5 ലക്ഷം രൂപ വരെ വരുമാനം ഉണ്ടെങ്കിൽ 12,500 രൂപ നൽകണം. 12,500 രൂപ റിബേറ്റ് നൽകുമ്പോൾ ഫലത്തിൽ നികുതി ഇല്ല. 60 വയസ്സ് തികഞ്ഞ മുതിർന്ന പൗരന്മാർക്ക് 3 ലക്ഷം രൂപ വരെയും 80 തികഞ്ഞ സൂപ്പർ സീനിയർ പൗരന്മാർക്ക് 5 ലക്ഷം രൂപയുമാണ് നികുതി ഒഴിവിന്റെ പരിധി. ഭേദഗതി മൂലം 60 തികഞ്ഞവർക്ക് നികുതിയിൽ 10,000 രൂപയുടെ കുറവു മാത്രമേ ഉണ്ടാവൂ. 80 തികഞ്ഞവർക്ക് നേട്ടമൊന്നുമില്ല.

∙ശമ്പള വരുമാനക്കാർക്ക് 40,000 രൂപയുടെ സ്റ്റാൻഡേഡ് ഡിഡക്‌‌ഷൻ കിഴിവ് 50,000 രൂപയായി വർധിപ്പിച്ചു. വരുമാനത്തിൽ നിന്ന് 2 ലക്ഷം രൂപ വരെ ഭവന വായ്പ പലിശ കിഴിവ്, ലൈഫ് ഇൻഷുറൻസ്, പിഎഫ്, കുട്ടികളുടെ ട്യൂഷൻ ഫീസ്, ഭവന വായ്പ മുതലിലേക്കുള്ള അടവ് എന്നിവ ചേർന്ന് 1.5 ലക്ഷം രൂപ വരെ 80 സി വകുപ്പ് പ്രകാരം കിഴിവ് ഉണ്ട്.

∙സേവിങ്സ് ബാങ്ക് പലിശയ്ക്ക് 10,000 രൂപ വരെ നികുതി ഒഴിവ്.

∙മെഡിക്കൽ ഇൻഷുറൻസിന് 25,000 രൂപ (മുതിർന്ന പൗരനാണെങ്കിൽ 50,000 രൂപ). പ്രിവന്റീവ് ഹെൽത്ത് ചെക്കപ്പിന് 5000 രൂപ. മാതാപിതാക്കളുടെ  മെഡിക്കൽ ഇൻഷുറൻസിന് മറ്റൊരു 25,000 രൂപ (മുതിർന്ന പൗരനാണെങ്കിൽ 50,000 രൂപ).

നിക്ഷേപങ്ങളിലൂടെയും ഭവന വായ്പ പലിശ കിഴിവും മറ്റും പരിഗണിക്കുമ്പോൾ 8 ലക്ഷം രൂപയോളം നികുതി ആനുകൂല്യമുണ്ട്. 

∙ ബാങ്ക്, പോസ്റ്റ് ഓഫിസ് നിക്ഷേപത്തിൽ നിന്നുള്ള പലിശയ്ക്ക് സ്രോതസ്സിൽ നികുതി പിടിക്കുന്ന പരിധി 40,000 രൂപയാക്കി വർധിപ്പിച്ചു. നികുതി ബാധകമായ പരിധിയിൽ താഴെയാണ് വരുമാനമെങ്കിൽ (5 ലക്ഷം) സ്രോതസ്സിൽ നികുതി പിടിക്കാതിരിക്കാൻ ബാങ്കിന് ഫോം 15ജി / 15 എച്ച് ഡിക്ലറേഷൻ നൽകിയാൽ മതി.

∙ കെട്ടിടം, യന്ത്രോപകരണ വാടക വർഷം 2,40,000 രൂപയിൽ കൂടിയാൽ വാടക നൽകുന്ന ആൾ സ്രോതസ്സിൽ നികുതി പിടിക്കണം. (കെട്ടിടത്തിന് 10%, ഉപകരണ വാടക 2%). കെട്ടിട ഉടമയുടെ വരുമാനം 5 ലക്ഷത്തിൽ താഴെയാണെങ്കിൽ ഡിക്ലറേഷൻ നൽകിയാൽ സ്രോതസ്സിൽ നികുതി പിടിക്കുന്നത് ഒഴിവാക്കാം.

∙ 2 വീട് വരെ സ്വന്തം ആവശ്യത്തിന് ഉപയോഗിക്കാം. മൂന്നാമത്തെ വീടിന്റെ ന്യായ വാടക വരുമാനത്തിൽ ഉൾപ്പെടുത്തണം.

∙ വിറ്റു കിട്ടുന്ന ലാഭം ഉപയോഗിച്ച് ഇനി 2 വീടുവരെ വാങ്ങാം. മൂലധന നേട്ടം 2 കോടി രൂപയിൽ താഴെയാണെങ്കിൽ മാത്രമേ ആനുകൂല്യം ലഭിക്കൂ. മുൻപ് ഒരു വീടിനു മാത്രമായിരുന്നു (54ാം വകുപ്പ്).

∙ ആദായ നികുതി റീഫണ്ടിന് ഇനി 24 മണിക്കൂർ മതി. അതായത് റിട്ടേൺ നൽകി അടുത്ത ദിവസംതന്നെ അധികം അടച്ച / ടിഡിഎസ് പിടിച്ച തുക റീഫണ്ടായി ലഭിക്കും. റീഫണ്ടിന് പ്രതിമാസ പലിശ അര ശതമാനം. റിയൽ എസ്റ്റേറ്റ് മേഖലയിൽ പൂർത്തിയായ കെട്ടിടങ്ങൾ / വിൽക്കാതെ പോയ ഫ്ലാറ്റുകൾ ബിൽഡർ കൈവശം വച്ചാൽ ഇനി 2 വർഷത്തിനു ശേഷം മാത്രമേ വാടക വരുമാനത്തിൽ ഉൾപ്പെടുത്തേണ്ടതുള്ളൂ. 

സ്ലാബിൽ മാറ്റമില്ല; 2.5 ലക്ഷത്തിന‍ു മുകളിൽ നികുതി 

നിലവിൽ രണ്ടര ലക്ഷം രൂപ വരെ വാർഷിക വരുമാനമുള്ളവർക്കു നികുതിയില്ല. 2.5 ലക്ഷം മുതൽ 5 ലക്ഷം വരെ വരുമാനമുള്ളവർക്ക് 5 ശതമാനം. 5 ലക്ഷം മുതൽ 10 ലക്ഷം വരെയുള്ളവർക്ക് 12,500 രൂപയും 20 ശതമാനവും. അതിനു മേലുള്ളവർക്കു 1,12,500 രൂപയും 30 ശതമാനവുമാണു നികുതി. സർക്കാരിന്റെ വാഗ്ദാന പ്രകാരം, നികുതിരഹിത വരുമാന പരിധി 5 ലക്ഷമാകും. വരുമാനം 5 ലക്ഷത്തിൽ കൂടുതലാണെങ്കിൽ, രണ്ടര ലക്ഷത്തിനു മുകളിലുള്ള തുകയ്ക്കു മേൽ നികുതി ഈടാക്കും; രണ്ടര ലക്ഷം മുതൽ അഞ്ചു ലക്ഷം വരെയുള്ളതിന് അഞ്ചു ശതമാനവും (12,500 രൂപ) അതിനു മേലുള്ളവയ്ക്ക് 20 ശതമാനവും ബാധകമാകും. 

ആദായനികുതി ഇളവ് അറിയാൻ ഓൺലൈൻ കാൽകുലേറ്റർ >

വരുമാനം 5 ലക്ഷം രൂപ കടന്നാൽ

വരുമാനം 5.50 ലക്ഷം രൂപയാണെങ്കിൽ 50,000 രൂപയ്ക്ക് 20 ശതമാനവും 5 ലക്ഷം രൂപയ്ക്കു വരെ 5 ശതമാനം നികുതിയായ 12,500 രൂപയും നൽകണം. ഇതിനു പുറമെ 4 ശതമാനം സെസ്സും.

ഇതുവരെ നടപ്പാക്കിയ ആദായനികുതി മാറ്റങ്ങൾ

2014–15

∙ നികുതി ഇളവ് പരിധി 2 ലക്ഷത്തിൽ നിന്ന് 2.5 ലക്ഷമാക്കി.

∙മുതിർന്ന പൗരന്മാരുടെ ഇളവ് (60–80 വയസ്സ്) 3 ലക്ഷമാക്കി.

∙സെക്‌ഷൻ 80 സി നിക്ഷേപ പരിധി ആനുകൂല്യം  ഒരു ലക്ഷത്തിൽ നിന്ന് 1.5 ലക്ഷമാക്കി.

∙ഭവന വായ്പ ആനുകൂല്യപരിധി 1.5 ലക്ഷത്തിൽ നിന്ന് 2 ലക്ഷമായി ഉയർത്തി. 

2015–16

∙ദേശീയ പെൻഷൻ പദ്ധതി പരിധിയിലെ നികുതി ഇളവ് ആനുകൂല്യം 80സിസിഡി(1ബി) 50,000 രൂപ വർധിപ്പിച്ചു.

∙യാത്ര അലവൻസ് പരിധി ഇരട്ടിയാക്കി (800  നിന്ന് 1,600 രൂപ).

∙ആരോഗ്യ ഇൻഷുറൻസ് ആദായ നികുതി ആനുകൂല്യം 15,000ൽ നിന്ന് 25,000 രൂപയാക്കി. മുതിർന്ന പൗരന്മാർക്ക് 20,000ൽ നിന്ന് 30,000 രൂപയാക്കി.

∙സുകന്യസമൃദ്ധി നിധി യോജന നിക്ഷേപങ്ങൾ പബ്ലിക്ക് പ്രോവിഡന്റ് ഫണ്ട് അനുകൂല്യങ്ങൾക്കു തുല്യമാക്കി.

∙ഒരു കോടി രൂപയ്ക്കു മുകളിലുള്ള വരുമാനത്തിന് നികുതി വിധേയമായ തുകയ്ക്ക് സർചാർജ് 10 ൽ നിന്ന് 12 ശതമാനമാക്കി.

∙സ്വത്തു നികുതി ഉപേക്ഷിച്ചു.

2016–17

∙വീട്ടു വാടക ആനുകൂല്യ പരിധി 24,000 രൂപയിൽ നിന്ന് 60,000 ആയി ഉയർത്തി.

∙5 ലക്ഷം വരെ വരുമാനമുള്ളവരുടെ നികുതി റിബേറ്റ്  2,000 രൂപയിൽ നിന്ന് 5,000 ആയി ഉയർത്തി.

∙ഒരു കോടി രൂപയ്ക്കു മുകളിലുള്ള വരുമാനത്തിന് നികുതി വിധേയമായ തുകയ്ക്ക് സർചാർജ് 12 ൽ നിന്ന് 15 ശതമാനമാക്കി.

∙വസ്തു വാങ്ങുന്നവർക്ക് 50,000 രൂപയുടെ കിഴിവ്  (െസക്ഷൻ 80ഇഇ). 

2017–18

∙ 2.5 –5.0 ലക്ഷം വരെയുള്ള വരുമാനത്തിന്റെ നികുതി നിരക്ക് 10 ൽ നിന്ന് 5% ആക്കി; 12,500 രൂപയുടെ നികുതി റിബേറ്റ്.

∙ 50 ലക്ഷം – ഒരു കോടി വരെ വരുമാനക്കാർക്ക്  10 % സർചാർജ്.

2018 – 19

∙ശമ്പള വിഭാഗക്കാർക്ക്  40,000 രൂപ സ്റ്റാൻഡേഡ് ഡിഡക്ഷൻ ആനുകൂല്യം. 

∙ ചികിത്സാ സഹായം, യാത്ര അലവൻസ് ആനുകൂല്യം 5,800 രൂപയാക്കി ചുരുക്കി. 

∙ആദായ, കോർപറേറ്റ് നികുതിക്കൾക്കു മേലുള്ള സെസ് മൂന്നു ശതമാനത്തിൽ‍നിന്ന് 4% ആയി ഉയർത്തി.