പ്രിയങ്ക മത്സരിക്കുമോ?; യുപി കാത്തിരിക്കുന്നു
Mail This Article
ന്യൂഡൽഹി∙ രാഹുൽഗാന്ധി അമേഠിക്കു പുറമെ രണ്ടാംമണ്ഡലത്തിൽ കൂടി മത്സരിച്ചേക്കുമെന്ന സൂചനകൾ പുറത്തുവന്നതിനു പിന്നാലെ സഹോദരിയും എഐസിസി ജനറൽ സെക്രട്ടറിയുമായ പ്രിയങ്ക ഗാന്ധിയെയും സ്ഥാനാർഥിയാക്കണമെന്ന ആവശ്യം പാർട്ടി യുപി ഘടകത്തിൽ ശക്തം. കഴിഞ്ഞതവണ ബിജെപി തൂത്തുവാരിയ സംസ്ഥാനത്ത് ഇക്കുറി കോൺഗ്രസിനു ശക്തമായ പോരാട്ടം കാഴ്ചവയ്ക്കാൻ പ്രിയങ്ക മത്സരരംഗത്തുണ്ടാവണമെന്നാണു വാദം.
അതേസമയം, രാഹുൽ, സോണിയാ ഗാന്ധി എന്നിവർ നിലവിൽ മത്സരരംഗത്തുള്ളതിനാൽ, ഒരു കുടുംബത്തിൽ നിന്നു 3 പേർ സ്ഥാനാർഥികളാവേണ്ടെന്നാണു ദേശീയ നേതൃത്വത്തിന്റെ വിലയിരുത്തൽ. സംഘടനാതലത്തിൽ പാർട്ടിശക്തിപ്പെടുത്തുന്നതിൽ ശ്രദ്ധ കേന്ദ്രീകരിക്കുന്ന പ്രിയങ്ക തൽക്കാലം മത്സരരംഗത്തേക്കില്ലെന്ന നിലപാടിലാണ്.
എന്നാൽ, യുപിയിലെ നേതാക്കളും പ്രവർത്തകരും ഒന്നടങ്കം ആവശ്യപ്പെടുന്ന സാഹചര്യമുണ്ടായാൽ തീരുമാനം പ്രിയങ്ക പുന:പരിശോധിച്ചേക്കുമെന്നു പാർട്ടിവൃത്തങ്ങൾ ചൂണ്ടിക്കാട്ടി.
