ജൻ ധൻ അക്കൗണ്ടുകളിൽ ഒരു ലക്ഷം കോടിയിലേക്ക്

ന്യൂഡൽഹി∙ രാജ്യത്തെ ജൻ ധൻ ബാങ്ക് അക്കൗണ്ടുകളിലെ മൊത്തം നിക്ഷേപം ഏപ്രിൽ മൂന്നിലെ കണക്കുകൾ പ്രകാരം 97,665.66 കോടി രൂപ. മൊത്തം ജൻ ധൻ അക്കൗണ്ടുകൾ 35.39 കോടിയായി. ബിജെപി സർക്കാർ 2014ലാണ് പ്രധാനമന്ത്രി ജൻ ധൻ യോജന (പിഎംജെഡിവൈ) നടപ്പാക്കിയത്. 

എല്ലാ കുടുംബങ്ങൾക്കും ബാങ്ക് അക്കൗണ്ട് ആയിരുന്നു ആദ്യലക്ഷ്യം; ഇതു പിന്നീട് എല്ലാ മുതിർന്ന വ്യക്തികൾക്കും ബാങ്ക് അക്കൗണ്ട് എന്നായി. അക്കൗണ്ട് ഉടമകളിൽ 50 ശതമാനത്തിലേറെ സ്ത്രീകളാണ്. 59% അക്കൗണ്ടുകളും ഗ്രാമീണ, അർധ നഗര മേഖലകളിലും. 

പദ്ധതി വിജയമായതോടെ അക്കൗണ്ട് ഉടമകളുടെ അപകട ഇൻഷുറൻസ് തുക ഒരു ലക്ഷം രൂപയിൽനിന്നു രണ്ടു ലക്ഷമാക്കി ഉയർത്തി. കേന്ദ്ര സർക്കാർ ആനുകൂല്യങ്ങൾ നേരിട്ടു ബാങ്കിലേക്കു നൽകാനും ജൻ ധൻ അക്കൗണ്ടുകൾ സഹായിച്ചു.