മസ്തിഷ്കജ്വരം: ബിഹാറിൽ മരിച്ച കുട്ടികളുടെ എണ്ണം 83 ആയി

പട്ന ∙ ബിഹാറിൽ മുസാഫർപുർ ജില്ലയിൽ ഇന്നലെ ഒരു കുട്ടി കൂടി മരിച്ചതോടെ മസ്തിഷ്കജ്വരം മൂലം മരിച്ച കുട്ടികളുടെ എണ്ണം 83 ആയി. കുട്ടികളുടെ കുടുംബത്തിന് 4 ലക്ഷം രൂപ വീതം നൽകുമെന്നു മുഖ്യമന്ത്രി നിതീഷ് കുമാർ അറിയിച്ചു.

ഈ മാസം ഒന്നു മുതൽ സർക്കാർ വക ശ്രീകൃഷ്ണ മെഡിക്കൽ കോളജ് ആൻഡ് ഹോസ്പിറ്റലിൽ (എസ്കെഎംസിഎച്ച്) 197 കുട്ടികളെയും കേജ്‌രിവാൾ ആശുപത്രിയിൽ 91 കുട്ടികളെയും മസ്തിഷ്കജ്വരം (അക്യൂട്ട് എൻസെഫലിറ്റിസ് സിൻഡ്രോം) സംശയിച്ചു പ്രവേശിപ്പിച്ചിരുന്നു.

എന്നാൽ എസ്കെഎംസിഎച്ചിൽ 69 കുട്ടികളും കേജ്‌രിവാൾ ആശുപത്രിയിൽ 14 കുട്ടികളും മരിച്ചതായി ആരോഗ്യവകുപ്പ് അധികൃതർ അറിയിച്ചു. ഇതേസമയം രക്തത്തിൽ പഞ്ചസാരയുടെ അളവു പെട്ടെന്നു താഴുന്ന ഹൈപ്പോഗ്ലൈസീമിയ മൂലമാണ് 10 വയസ്സിൽ താഴെയുള്ള ഏറെ കുട്ടികളും മരിച്ചതെന്നും അഭിപ്രായമുണ്ട്.