ഡൽഹി വിമാനത്താവളത്തിൽ വീണ്ടും ആൾമാറാട്ടം

ന്യൂഡൽഹി ∙ ഇന്ദിരാഗാന്ധി രാജ്യാന്തര വിമാനത്താവളത്തിൽ യാത്രക്കാരൻ വീണ്ടും ആൾമാറാട്ടത്തിനു പിടിയിൽ. ഹോങ്കോങ്ങിൽ നിന്നു കർണെൽ സിങ് എന്ന വ്യാജ പേരിൽ വ്യാജ പാസ്പോർട്ടുമായി എത്തിയ പ‍ഞ്ചാബിലെ മോഗ സ്വദേശി ഗുർദീപ് സിങ് ആണ് പിടിയിലായത്. 68 കാരനായ ഇയാൾ 89 കാരനായാണ് ഡൽഹിയിലെത്തിയത്. 5 ദിവസം മുൻപ് 81 കാരനായി വേഷമിട്ട 32 വയസ്സുകാരനെ ഇവിടെ പിടികൂടിയിരുന്നു.

ഗുർദീപ് സിങ്ങിന്റെ പാസ്പോർട്ടിൽ ജനനത്തീയതി 1930 ഒക്ടോബർ 30 ആയിരുന്നു. 2008 മുതൽ വ്യാജ പാസ്പോർട്ടിൽ ഇയാൾ ഹോങ്കോങ്ങിലേക്കു യാത്ര ചെയ്യുന്നു. സ്ഥിര താമസക്കാർക്കുള്ള ഐഡിയുമുണ്ട്.