സമൂഹമാധ്യമങ്ങളെ ആധാറുമായി ബന്ധിപ്പിക്കാൻ മാർഗരേഖയുണ്ടോ?: സുപ്രീം കോടതി

ന്യൂഡൽഹി ∙ സമൂഹ മാധ്യമങ്ങളിലെ അക്കൗണ്ടുകൾ ആധാർ നമ്പറുമായി ബന്ധിപ്പിക്കുന്നതിനു മാർഗരേഖ തയാറാക്കാൻ ആലോചനയുണ്ടോയെന്നു വ്യക്തമാക്കാൻ കേന്ദ്ര സർക്കാരിനോടു സുപ്രീം കോടതി ആവശ്യപ്പെട്ടു. സമൂഹമാധ്യമങ്ങളിലെ അക്കൗണ്ടിന് ഒൗദ്യോഗിക തിരിച്ചറിയൽ സംവിധാനങ്ങൾ വേണമെന്നാവശ്യപ്പെട്ട് ഹൈക്കോടതികളിലുള്ള ഹർജികൾ സുപ്രീം കോടതിയിലേക്കു മാറ്റണോ എന്നതിൽ ഈ മാസം 24നു വാദം കേൾക്കുമെന്നും ജസ്റ്റിസ് ദീപക് ഗുപ്ത അധ്യക്ഷനായ ബെഞ്ച് വ്യക്തമാക്കി.

സമൂഹമാധ്യമ അക്കൗണ്ട് വിഷയത്തിൽ മദ്രാസ്, മധ്യപ്രദേശ്, ബോംബെ ഹൈക്കോടതികളിലാണ് കേസുകളുള്ളത്. ഈ കേസുകൾ സുപ്രീം കോടതിയിലേക്കു മാറ്റണമെന്നാവശ്യപ്പെട്ട് ഫെയ്സ്ബുക്കാണ് ഹർജി നൽകിയത്. കേസുകൾ സുപ്രീം കോടതിയിലേക്കു മാറ്റുന്നതിൽ എതിർപ്പില്ലെങ്കിലും ഹൈക്കോടതികൾ ഈ കേസുകളിൽ ഏറെ സമയം ചെലവിട്ടു കഴിഞ്ഞെന്നതു പരിഗണിക്കണമെന്ന് കേന്ദ്ര സർക്കാരിനുവേണ്ടി സോളിസിറ്റർ ജനറൽ തുഷാർ മേത്ത വാദിച്ചു. മദ്രാസ് ഹൈക്കോടതിയിലെ കേസ് തുടരാൻ അനുവദിക്കണമെന്ന് തമിഴ്നാട് സർക്കാർ അപേക്ഷ നൽകിയിട്ടുണ്ട്.