2024 നുള്ളിൽ രാജ്യമൊട്ടാകെ പൗര റജിസ്റ്റർ: അമിത് ഷാ
Mail This Article
ന്യൂഡൽഹി ∙ 2024 നുള്ളിൽ ദേശീയ പൗര റജിസ്റ്റർ രാജ്യമൊട്ടാകെ തയാറാക്കുമെന്ന് കേന്ദ്ര ആഭ്യന്തരമന്ത്രി അമിത് ഷാ. ഹരിയാനയിൽ തിരഞ്ഞെടുപ്പു റാലിയിൽ പ്രസംഗിക്കുകയായിരുന്നു അദ്ദേഹം.
‘പൗര റജിസ്റ്റർ പൂർത്തിയാക്കുമ്പോൾ ഈ രാജ്യത്ത് ഒരു അനധികൃത താമസക്കാരനും ഉണ്ടാവില്ല. 2024 ൽ ജനവിധി തേടി ഞങ്ങൾ വീണ്ടും വരുമ്പോൾ പൗര റജിസ്റ്ററിന്റെ ജോലികൾ പൂർത്തിയാക്കിയിരിക്കും’– ഷാ പറഞ്ഞു.കശ്മീരിനുള്ള പ്രത്യേക പദവി റദ്ദാക്കിയതിനെ കോൺഗ്രസ് എതിർക്കുന്നത് എന്തിനാണ്? ദേശീയ താൽപര്യത്തിനു വേണ്ടി ബിജെപി സർക്കാർ എടുക്കുന്ന എല്ലാ തീരുമാനങ്ങളെയും കോൺഗ്രസ് എതിർക്കുകയാണെന്നും ഖെയ്ത്താളിൽ തിരഞ്ഞെടുപ്പു റാലിയിൽ ആഭ്യന്തര മന്ത്രി കുറ്റപ്പെടുത്തി.
ഹൂസ്റ്റണിൽ ഹൗഡി മോദി പരിപാടിയിൽ പങ്കെടുത്ത അമേരിക്കൻ പ്രസിഡന്റ് ഡോണൾഡ് ട്രംപ് പോലും മോദിയുടെ ജനപിന്തുണ കണ്ട് അത്ഭുതപ്പെട്ടു. മൻമോഹൻസിങ് വിദേശത്തു പോയാൽ ആരും അറിയാറില്ലായിരുന്നു. സോണിയ എഴുതിക്കൊടുക്കുന്നത് വായിക്കലായിരുന്നു മൻമോഹൻ ചെയ്തിരുന്നതെന്നും അമിത്ഷാ പരിഹസിച്ചു.