പരാതിക്കാരിയുടെ ജാമ്യത്തിനെതിരെ ചിന്മയാനന്ദും യുപി പൊലീസും

അലഹാബാദ് ∙ ബിജെപി നേതാവും മുൻ കേന്ദ്ര മന്ത്രിയുമായ ചിന്മയാനന്ദ് പീഡിപ്പിച്ചതായി പരാതിപ്പെട്ടതിനെ തുടർന്ന് അപകീർത്തിപ്പെടുത്തി പണം തട്ടാൻ ശ്രമിച്ചുവെന്ന കേസിൽ ഉൾപ്പെടുത്തി ജയിലിലടയ്ക്കപ്പെട്ട നിയമ വിദ്യാർഥിനി ജാമ്യാപേക്ഷ നൽകി. എന്നാൽ ജാമ്യാപേക്ഷയെ ഉത്തർപ്രദേശ് പൊലീസും ചിന്മയാനന്ദിന്റെ അഭിഭാഷകനും എതിർത്തതിനെ തുടർന്ന് അലഹാബാദ് ഹൈക്കോടതി ജാമ്യാപേക്ഷയ്ക്കെതിരെയുള്ള തടസ്സങ്ങൾ ഉന്നയിക്കാൻ അവർക്കു രണ്ടാഴ്ച സമയം അനുവദിച്ചു.

കള്ളക്കേസിൽ കുടുക്കി അവളെ തടവിലാക്കിയിരിക്കുകയാണെന്നും ജാമ്യം നൽകണമെന്നും വിദ്യാർഥിനിയുടെ അഭിഭാഷക ഹൈക്കോടതിയിൽ ആവശ്യപ്പെട്ടു. എന്നാൽ സർക്കാരിന്റെയും ചിന്മയാനന്ദിന്റെയും അഭിഭാഷകർ കൂടുതൽ സമയം ആവശ്യപ്പെട്ടു. ഇതേതുടർന്നാണു ജാമ്യാപേക്ഷ നവംബർ 6നു പരിഗണിക്കാൻ മാറ്റിയത്.