ഭാരതീയ വേഷത്തിൽ നൊബേൽ സ്വീകരിച്ച് അഭിജിത്തും എസ്തേറും

സ്റ്റോക്കോം ∙ മുണ്ടും കുർത്തയുമണിഞ്ഞ് അഭിജിത് ബാനർജി, സാരിയിൽ എസ്തേർ ദഫ്ലോ – സ്റ്റോക്കോമിലെ കൺസർട്ട് ഹാളിൽ ഭാരതീയ വേഷത്തിൽ നൊബേൽ സമ്മാനം ഏറ്റുവാങ്ങി എസ്തേറും ഭർത്താവ് അഭിജിത്തും ചരിത്രം കുറിച്ചു. അഭിജിത് – എസ്തേർ ദമ്പതികൾക്കൊപ്പം സാമ്പത്തിക നൊബേൽ പങ്കുവച്ച യുഎസ് പ്രഫസർ മൈക്കൽ ക്രമറും സ്വീഡനിലെ രാജാവ് കാൾ ഗുസ്താഫിൽ നിന്ന് പുരസ്കാരം സ്വീകരിച്ചു.a

ബംഗാളിൽ നിന്ന് മുൻപ് 2 പേർ (രവീന്ദ്രനാഥ് ടാഗോർ, അമർത്യ സെൻ) നൊബേൽ നേടിയിട്ടുണ്ടെങ്കിലും പരമ്പരാഗത ധോത്തിയും കുർത്തയുമണിഞ്ഞ് അതു സ്വീകരിച്ചത് മൂന്നാമൻ അഭിജിത് മാത്രം.

തങ്ങളുടെ ഗവേഷണവുമായി ബന്ധപ്പെട്ട 2 ഉപഹാരങ്ങൾ അഭിജിത്തും എസ്തേറും നൊബേൽ മ്യൂസിയത്തിനു സമ്മാനിച്ചു – ഘാനയിൽ നിന്നുള്ള ബാഗുകളും ഇന്ത്യയിൽ നിന്നുള്ള കുട്ടികളുടെ പുസ്തകങ്ങളും.

ഘാനയിലെ സ്ത്രീകൾ നിർമിച്ചതാണ് ബാഗുകളെങ്കിൽ പുസ്തകങ്ങൾ ഇന്ത്യയിലെ സന്നദ്ധസംഘടനയായ ‘പ്രഥം’ പ്രസിദ്ധീകരിച്ചതാണ്. സാമ്പത്തിക തത്വങ്ങളെ ദാരിദ്ര്യം തുടച്ചു നീക്കാൻ എങ്ങനെ പ്രയോഗ പാഠങ്ങളാക്കി മാറ്റാം എന്നു തെളിയിച്ചതിന് നൊബേൽ നേടിയ അഭിജിത് – എസ്തേർ – ക്രമർ കൂട്ടുകെട്ടിന്റെ പ്രധാന ഗവേഷണ മേഖലകളായിരുന്നു ഇന്ത്യയും ഘാനയും.

‘ഞങ്ങൾ ഒരു വലിയ മുന്നേറ്റത്തെയാണ് പ്രതിനിധീകരിക്കുന്നത്. യഥാർഥ ചോദ്യങ്ങൾക്കു മറുപടി കണ്ടെത്തുന്നതിലൂടെ ലോകത്തെ ദാരിദ്ര്യത്തിനു പരിഹാരം കാണാൻ കഴിയുമെന്നു വിശ്വസിക്കുന്ന ഒരു പ്രസ്ഥാനമാണത്. ഈ പുരസ്കാരം ഞങ്ങൾ നേടിയ കാര്യങ്ങൾക്കു മാത്രമുള്ള അംഗീകാരമല്ല, ഭാവിയിൽ എന്തു നേടാനാകുമെന്നതിനു കൂടിയുള്ളതാണ്’’ – പുരസ്കാരം സ്വീകരിച്ചുകൊണ്ട് എസ്തേർ ദഫ്ലോ പറഞ്ഞു.