യുഎഇയിലേക്ക് പോകാനും പ്രത്യേക വിമാനങ്ങൾ

ന്യൂഡൽഹി ∙ ഇന്ത്യയിൽ നിന്നു യുഎഇയിലേക്കും തിരിച്ചുമുള്ള പ്രത്യേക വിമാന സർവീസുകൾക്ക് രണ്ടാഴ്ചത്തേക്ക് അനുമതി. ഈ മാസം 12 മുതൽ 26 വരെ  ഇരു രാജ്യങ്ങളിലെയും വിമാനങ്ങൾക്ക് ഇരു വശത്തേക്കും യാത്രക്കാരുമായി സഞ്ചരിക്കാം.

ഇതോടെ, ഇന്ത്യയിൽ നിന്ന് എയർ ഇന്ത്യ വിമാനങ്ങളും യുഎഇയിൽ നിന്ന് സ്വകാര്യ ചാർട്ടേഡ് വിമാനങ്ങളും സർവീസ് നടത്തും. എയർ ഇന്ത്യ ടിക്കറ്റ് ബുക്കിങ് ആരംഭിച്ചു. 26നു ശേഷവും സർവീസ് തുടരുന്നതു സംബന്ധിച്ച് പിന്നീട് തീരുമാനമെടുക്കും. 

തങ്ങളുടെ രാജ്യത്ത് നിന്നുള്ള ചാർട്ടേഡ് വിമാനങ്ങൾക്ക് ഇന്ത്യ അനുമതി നിഷേധിച്ചതിനു പിന്നാലെ എയർ ഇന്ത്യ വിമാനങ്ങളിൽ ഇന്ത്യയിൽ നിന്ന് യാത്രക്കാരെ എത്തിക്കുന്നത് യുഎഇ വിലക്കിയിരുന്നു. നയതന്ത്രതലത്തിൽ നടത്തിയ ചർച്ചകളിലാണു പ്രശ്നപരിഹാരത്തിനു വഴിയൊരുങ്ങിയത്. ഇതോടെ, യുഎഇയിൽ ജോലി ചെയ്യുന്നവർക്ക് ഇനി മടങ്ങാം.