അധികാരമേറ്റ് നാലാം ദിവസം ബിഹാർ മന്ത്രി രാജിവച്ചു

പട്ന ∙ ബിഹാറിൽ തിങ്കളാഴ്ച അധികാരമേറ്റ നിതീഷ്കുമാർ മന്ത്രിസഭയിലെ വിദ്യാഭ്യാസമന്ത്രി മേവാലാൽ ചൗധരി രാജിവച്ചു. ജെഡിയു അംഗമായ മേവാലാൽ മുൻപ് ഭാഗൽപുരിലെ ബിഹാർ കാർഷിക സർവകലാശാല വൈസ് ചാൻസലറായിരിക്കെ അധ്യാപക, ശാസ്ത്രജ്ഞ നിയമനങ്ങളിൽ അഴിമതി നടത്തിയെന്ന കേസ് കോടതിയിലുണ്ട്. ഇക്കാര്യം ചൂണ്ടിക്കാട്ടി ആർജെഡി നേതാവ് തേജസ്വി യാദവിന്റെ നേതൃത്വത്തിൽ പ്രതിപക്ഷം ശക്തമായി രംഗത്തുവന്നിരുന്നു. 

ഇന്നലെ ഓഫിസിലെത്തി ചുമതലയേറ്റതിനു തൊട്ടു പിന്നാലെ മേവാലാൽ രാജിവച്ചു. ഗവർണർ രാജി സ്വീകരിച്ചു. മേവാലാൽ ദേശീയഗാനം തെറ്റിച്ചു പാടുന്നതിന്റെ വിഡിയോ കഴിഞ്ഞ ദിവസങ്ങളിൽ വൈറലായിരുന്നു. ദേശീയഗാനം അറിയാത്തയാളെയാണു വിദ്യാഭ്യാസമന്ത്രിയാക്കിയതെന്നും പ്രതിപക്ഷം പരിഹസിച്ചിരുന്നു.

English Summary: Nitish Kumar's Minister, Facing Probe, Quits Hours After Taking Charge