സോംനാഥ് ഭാരതിക്ക് 2 വർഷം തടവുശിക്ഷ

ന്യൂഡൽഹി ∙ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലെ (എയിംസ്) ജീവനക്കാരനെ മർദിച്ച സംഭവത്തിൽ ആംആദ്മി പാർട്ടി എംഎൽഎയും മുൻ മന്ത്രിയുമായ സോംനാഥ് ഭാരതിക്ക് 2 വർഷത്തെ തടവ്.

ഒരു ലക്ഷം രൂപ പിഴയൊടുക്കാനും അഡീഷനൽ മെട്രോപ്പൊലിറ്റൻ മജിസ്ട്രേട്ട് രവീന്ദ്ര കുമാർ പാണ്ഡെ ഉത്തരവിട്ടു. 2016 സെപ്റ്റംബർ 9 ന് എയിംസിന്റെ ചുറ്റുമതിൽ തകർത്ത് ഉള്ളിൽ പ്രവേശിച്ചു സുരക്ഷാ ജീവനക്കാരനായ ആർ.എസ്. റാവത്തിനെ മർദിച്ച കേസിലാണു വിധി.

കേസിലെ മറ്റു പ്രതികളായ ജഗത് സൈനി, ദിലീപ് ഝാ, സന്ദീപ് സോനു, രാകേഷ് പാണ്ഡെ എന്നിവരെ വിട്ടയച്ചു. ജാമ്യത്തിനു മേൽക്കോടതിയെ സമീപിക്കാൻ സമയം അനുവദിച്ചിട്ടുണ്ട്.