പുതിയ രോഗികൾക്ക് നിയന്ത്രണം ഏർപ്പെടുത്തി ഡൽഹിയിലെ ആശുപത്രികൾ

ന്യൂഡൽഹി ∙ ഓക്സിജൻ ക്ഷാമത്തെത്തുടർന്ന് ഡൽഹിയിൽ പല ആശുപത്രികളും രോഗികളെ പ്രവേശിപ്പിക്കുന്നതു താൽക്കാലികമായി നിർത്തി. കഴിഞ്ഞ ദിവസം 12 പേർ മരിച്ച മെഹ്റോളിയിലെ ബത്ര ആശുപത്രി പുതിയ രോഗികളെ പ്രവേശിപ്പിക്കാനാവില്ലെന്ന് വ്യക്തമാക്കി. 

ലജ്പത് നഗർ ഐബിഎസ് ആശുപത്രി അധികൃതർ പുതിയ രോഗികളെ പ്രവേശിപ്പിക്കില്ലെന്നു വ്യക്തമാക്കിയതോടെ സർക്കാർ 10 ഓക്സിജൻ സിലിണ്ടർ താൽക്കാലിക ആവശ്യത്തിനായി എത്തിച്ചു. അതിനിടെ, ഓക്സിജൻ ഉടൻ തീരുമെന്ന് ബെംഗളൂരുവിലെ 2 ആശുപത്രികൾ സമൂഹ മാധ്യമങ്ങളിലൂടെ അറിയിച്ചു. മൈസൂരു റോഡിലെ രാജരാജേശ്വരി മെഡിക്കൽ കോളജ് ആശുപത്രിയും ആർടി നഗറിലെ മെഡാക്സ് ആശുപത്രിയുമാണ് സന്ദേശം പങ്കുവച്ചത്.