മൂന്നാം വട്ടം അധികാരമേറ്റെടുത്ത് മമത

കൊൽക്കത്ത ∙ ബംഗാളിൽ മുഖ്യമന്ത്രിയായി മമത ബാനർജി സത്യപ്രതിജ്ഞ ചെയ്ത് അധികാരമേറ്റു. ഗവർണർ ജഗ്ദീപ് ധൻകർ പ്രതിജ്ഞ ചൊല്ലിക്കൊടുത്തു. തുടർച്ചയായ മൂന്നാം തവണയാണ് മമത മുഖ്യമന്ത്രിയാവുന്നത്. രാജ്ഭവനിൽ നടന്ന ചടങ്ങിനു ശേഷം മമത നിയമസഭാ മന്ദിരത്തിലെ ഓഫിസിലെത്തി ഗാർഡ് ഓഫ് ഓണർ സ്വീകരിച്ചു.

കോവിഡ് പ്രതിരോധ പ്രവർത്തനങ്ങൾക്കാണ് ഇപ്പോൾ മുൻഗണന കൊടുക്കുന്നതെന്ന് മമത പറഞ്ഞു. സംസ്ഥാനത്തെ ക്രമസമാധാന നില പുനഃസ്ഥാപിക്കാനുള്ള നിയമനങ്ങളും ഇടപെടലുകളും നടത്തുമെന്നും പറഞ്ഞു. 

എല്ലാ പാർട്ടികളും സംയമനം പാലിക്കണം. ബംഗാൾ അക്രമം ഇഷ്ടപ്പെടുന്നില്ല. കഴിഞ്ഞ 3 മാസം സംസ്ഥാനം തിരഞ്ഞെടുപ്പു കമ്മിഷനു കീഴിലായിരുന്നു. സംവിധാനങ്ങൾ കുത്തഴിഞ്ഞിട്ടുണ്ട്. – മമത പറഞ്ഞു. പ്രധാനമന്ത്രി നരേന്ദ്രമോദി ട്വിറ്ററിലൂടെ മമതയെ അഭിനന്ദിച്ചു.