ആദ്യം വാട്സാപ് വിഡിയോ കോൾ, എടുക്കും മുൻപ് വിഛേദിക്കും: പെഗസസിന്റെ പ്രവർത്തനം

തുടക്കം 2010ൽ; പിന്നാലെ കുതിപ്പ്

∙ പെഗസസ് എന്ന ചാര സോഫ്റ്റ്‌വെയറിന്റെ സ്രഷ്ടാക്കൾ ഇസ്രയേൽ സൈബർ ഇന്റലിജൻസ് കമ്പനിയായ എൻഎസ്ഒ

∙ തുടക്കം 2010ൽ. 2015ലെ കണക്കനുസരിച്ച് 15 കോടി ഡോളർ (1080 കോടി രൂപ) വരുമാനം.

∙ 100 കോടി യുഎസ് ഡോളറിനാണ് ആദ്യ ഉടമകളായ ഫ്രാൻസിസ്കോ പാർട്നേഴ്സ് 2017ൽ കമ്പനി വിൽപനയ്ക്കു വച്ചത്. പിന്നീട് യൂറോപ്യൻ പ്രൈവറ്റ് ഇക്വിറ്റി ഫണ്ടായ നൊവാൽഫിന ക്യാപ്പിറ്റൽ നിക്ഷേപം നടത്തി. 

∙ സർക്കാർ ഉപയോക്താക്കൾക്കു മാത്രം സോഫ്റ്റ്‌വെയർ വിൽക്കാനാണ് എൻഎസ്ഒയ്ക്ക് ഇസ്രയേൽ പ്രതിരോധ വകുപ്പിന്റെ അനുമതി.

∙ ഭീകരവാദികൾ, കൊടുംകുറ്റവാളികൾ എന്നിവരെ കണ്ടെത്താൻ മാത്രമാണ് പെഗസസ് ഉപയോഗിക്കുന്നതെന്നാണ് എൻഎസ്ഒയുടെ വിശദീകരണം. പക്ഷേ, ദുരുപയോഗിക്കാറുണ്ടെന്നു സുതാര്യതാ റിപ്പോർട്ടിൽ തുറന്നുപറച്ചിൽ

എൽ ചാപ്പോ മുതൽ ഖഷോഗി വരെ

∙ മെക്സിക്കൻ ലഹരിമരുന്നു മാഫിയ തലവൻ ‘എൽ ചാപ്പോ’ ജോക്വിം ഗുസ്മാനെ പിടികൂടാനായി മെക്സിക്കൻ സർക്കാർ 2011 ൽ ഉപയോഗിച്ചത് പെഗസസിന്റെ ആദ്യപതിപ്പ്

∙ 2016 ൽ യുഎഇയിലെ മനുഷ്യാവകാശ പ്രവർത്തകൻ അഹമ്മദ് മൻസൂറിനെ നിരീക്ഷിക്കാനായി പെഗസസ് ഉപയോഗിച്ചെന്ന് കാനഡയിലെ സിറ്റിസൻ ലാബിന്റെ വെളിപ്പെടുത്തൽ.

∙ഇസ്തംബുളിലെ സൗദി കോൺസുലേറ്റിൽ കൊല്ലപ്പെട്ട മാധ്യമപ്രവർത്തകൻ ജമാൽ ഖഷോഗിയെ നിരീക്ഷിക്കാൻ സൗദി അറേബ്യ പെഗസസ് ഉപയോഗിച്ചതായും റിപ്പോർട്ട്.

∙ 2019 ൽ ഇന്ത്യയിലെ മനുഷ്യാവകാശ പ്രവർത്തകർ, മാധ്യമപ്രവർത്തകർ എന്നിവരുടെയടക്കം ഫോൺവിവരങ്ങൾ ചോർത്തിയെന്ന വെളിപ്പെടുത്തലുണ്ടായി. ഭീമ- കൊറേഗാവ് സംഭവത്തിൽ അറസ്റ്റിലായവരെ പ്രതിനിധീകരിച്ച അഭിഭാഷകന്റെ വരെ വിവരങ്ങൾ ചോർത്തപ്പെട്ടു.

ഉപയോക്താക്കൾ ടോപ് സീക്രട്ട്

∙ 40 രാജ്യങ്ങളിലായി 60 സർക്കാർ ഉപയോക്താക്കൾ

∙ 51% ഇന്റലിജൻസ് ഏജൻസികൾ, 38 % നിയമപാലന ഏജൻസികൾ, 11 % സൈന്യം

സേവനം മാർക്ക് നോക്കി

∙ എ,ബി,സി,ഡി എന്നിങ്ങനെ 4 വിഭാഗങ്ങളായി രാജ്യങ്ങളെ തിരിക്കുന്നു. ഏറ്റവും റിസ്ക് കൂടിയ രാജ്യങ്ങൾ ഡി വിഭാഗത്തിൽ.

∙ അടുത്ത ഘട്ടത്തിൽ ഓരോ വിഭാഗത്തിനും 100 മാർക്കിൽ സ്കോറിടും. ഇതിൽ എ,ബി,സി വിഭാഗങ്ങളിൽ 60 മാർക്കിനു മുകളിലുള്ള രാജ്യങ്ങൾക്കു മാത്രം സേവനം. 20ൽ താഴെയെങ്കിൽ ഒഴിവാക്കും.

∙ ഓരോ രാജ്യത്തിന്റെ പശ്ചാത്തലം, മുൻകാല സംഭവങ്ങൾ എന്നിവ കണക്കാക്കിയാണ് മാർക്ക് ഇടുന്നത്.

ദുരുപയോഗത്തിന് വിലക്ക്!

∙ പെഗസസ് ദുരുപയോഗിച്ചതിന്റെ പേരിൽ 5 വർഷത്തിനിടയിൽ എൻ‌എസ്ഒ 10 സർക്കാർ ഉപയോക്താക്കളെ വിലക്കി. നഷ്ടം 746 കോടി രൂപ.

∙ മനുഷ്യാവകാശ പ്രശ്നങ്ങൾ മൂലം ഒരു വർഷത്തിനിടെ 15 % ബിസിനസ് സാധ്യതകൾ വേണ്ടെന്നു വച്ചു. ഇവയുടെ മൊത്തം മൂല്യം 2,238 കോടി രൂപ.

∙ ദുരുപയോഗ സാധ്യത മുൻനിർത്തി 55 രാജ്യങ്ങൾക്കു സേവനം നൽകില്ലെന്നു തീരുമാനം.

വേറെയും ഉൽപന്നങ്ങൾ

∙ പെഗസസിനു പുറമേ മറ്റു ടെക് ഇന്റലിജൻസ് ഉൽപന്നങ്ങൾ എൻഎസ്ഒയ്ക്കുണ്ട്. ഭീകരരെയും ലഹരി മാഫിയകളെയും കുട്ടികളെ ലൈംഗികമായി ഉപയോഗിക്കുന്നവരെയും കണ്ടെത്തുക, ഡ്രോൺ നുഴഞ്ഞുകയറ്റം തടയുക തുടങ്ങിയവയാണ് പ്രഖ്യാപിത ലക്ഷ്യങ്ങൾ.

ചാരന്മാർ വേറെയും

∙ എൻഎസ്ഒയ്ക്കു പുറമേ കാൻഡിരു, വെരിന്റ്, ക്വാഡ്രീം, സെലിബ്രൈറ്റ് എന്നീ കമ്പനികൾക്കും സമാന ചാര സോഫ്റ്റ്‌വെയറുകൾ.

∙ മൈക്രോസോഫ്റ്റിന്റെ പിഴവു മുതലെടുത്ത് കാൻഡിരു 10 രാജ്യങ്ങളിലായി ചോർത്തിയത് നൂറോളം പേരുടെ വിവരങ്ങൾ.

∙ പിഴവു പരിഹരിക്കുന്നതിനായി മൈക്രോസോഫ്റ്റ് പുതിയ അപ്ഡേറ്റ് പുറത്തിറക്കിയതു ദിവസങ്ങൾക്കു മുൻപ്.

പെഗസസിന്റെ പ്രവർത്തനം ഇങ്ങനെ

∙ ചോർത്തേണ്ട ഫോണിലേക്ക് വാട്സാപ് വിഡിയോ കോൾ വിളിക്കുകയാണ് ആദ്യപടി.

∙ മറുതലയ്ക്കലുള്ള ആൾ എടുക്കുന്നതിന് മുൻപ് കോൾ വിഛേദിക്കും.

∙ മിസ്ഡ് കോൾ കൈകാര്യം ചെയ്യുന്നതുമായി ബന്ധപ്പെട്ടുണ്ടായിരുന്ന വാട്സാപ് പിഴവു മുതലെടുത്തു ചാര സോഫ്റ്റ്‌വെയർ ഇൻസ്റ്റാൾ ചെയ്യപ്പെടുന്നു. ഈ പിഴവ് വാട്സാപ് പിന്നീടു പരിഹരിച്ചു.

∙ മിസ്ഡ് കോളിനു പുറമേ മെസേജ് ആയി എത്തുന്ന ലിങ്കുകൾ വഴിയും പെഗസസ് ഫോണുകളിലെത്തിയിട്ടുണ്ട്.

∙ പാസ്‍വേഡുകൾ, ഫോൺ നമ്പറുകൾ, എസ്എംഎസ് സന്ദേശങ്ങൾ, ലൈവ് കോളുകൾ എന്നിവയെല്ലാം ചോർത്താം. ഫോൺ ക്യാമറ, മൈക്രോഫോൺ എന്നിവ ഓൺ ചെയ്യാൻ സാധിക്കും. ജയിൽ ബ്രേക്കിങ് എന്നാണ് ഇതിനെ വിളിക്കുന്നത്.

Content Highlight: Pegasus spy software