കേന്ദ്രധനമന്ത്രിയുടെ നിർദേശം: ഇന്ധനവില കുറയ്ക്കാത്ത സംസ്ഥാനങ്ങളോട് ജനം ചോദിക്കണം

ന്യൂഡൽഹി ∙ ഇന്ധനവിലയിൽ കേന്ദ്രസർക്കാർ വരുത്തിയ കുറവിന് ആനുപാതികമായ കുറവുവരുത്താത്ത സംസ്ഥാന സർക്കാരുകളോടു പൗരന്മാർ തന്നെ ചോദിക്കണമെന്നു കേന്ദ്രമന്ത്രി നിർമല സീതാരാമൻ നിർദേശിച്ചു.

വാറ്റ് കുറയ്ക്കണമെന്നു കേന്ദ്രം അഭ്യർഥിച്ചതാണ്. അതുമാത്രമേ കേന്ദ്രത്തിനു ചെയ്യാൻ കഴിയൂ. – മന്ത്രി പറഞ്ഞു.

ജിഎസ്ടിയുടെ പരിധിയിൽ പെട്രോളിയം ഉൽപന്നങ്ങൾ ഉൾപ്പെടുത്തിയിട്ടുണ്ടെങ്കിലും ജിഎസ്ടി കൗൺസിൽ നിരക്കു നിശ്ചയിക്കാതെ നടപ്പാക്കാൻ കഴിയില്ലെന്നും മന്ത്രി ചൂണ്ടിക്കാട്ടി. 

നിക്ഷേപ അന്തരീക്ഷം മെച്ചപ്പെടുത്തുന്നതിനെക്കുറിച്ചു മുഖ്യമന്ത്രിമാരും ധനമന്ത്രിമാരുമായി ചർച്ച നടത്തിയതിനു പിന്നാലെയാണു നിർമലയുടെ പ്രതികരണം.

English summary: Nirmala Sitharaman on fuel price