പട്നയിൽ തുറന്ന ജീപ്പിൽ ലാലുവിന്റെ റോഡ് ഷോ
Mail This Article
പട്ന ∙ നിതീഷ് കുമാർ ബിഹാർ മുഖ്യമന്ത്രി സ്ഥാനത്ത് എത്തിയതിന്റെ 15–ാം വാർഷികാഘോഷദിനം ആർജെഡി അധ്യക്ഷൻ ലാലുപ്രസാദ് യാദവിന്റെ ‘റോഡ് ഷോ’യിൽ മുങ്ങി. പട്ന നിരത്തിലൂടെ തുറന്ന ജീപ്പ് ഓടിച്ചും ആർജെഡി ആസ്ഥാനത്ത് 6 ടണ്ണിന്റെ റാന്തൽ അനാവരണം ചെയ്തും ലാലു ടിവി ചാനലുകളിൽ നിറഞ്ഞുനിന്നു.
ലാലുവിന്റെ ആദ്യവാഹനമായിരുന്ന ജീപ്പ് ഏറെക്കാലമായി പത്നി റാബ്റി ദേവിയുടെ വസതിയിൽ വിശ്രമത്തിലായിരുന്നു.റോഡിലൂടെ ജീപ്പോടിച്ചു വരുന്ന ലാലുവിനെ കണ്ടു ജനം കൈവീശിയും ജയ് വിളിച്ചും ആവേശം പ്രകടിപ്പിച്ചു.
വീർചന്ദ് പട്ടേൽ പഥിലെ ആർജെഡി ആസ്ഥാനത്ത് 4 വർഷത്തിനു ശേഷമാണ് ലാലു എത്തിയത്. ഇവിടെ പാർട്ടി രജത ജൂബിലി ആഘോഷ പരിപാടിയിലും ലാലു പങ്കെടുത്തു. 2017 ജൂലൈ അഞ്ചിനു പാർട്ടി സ്ഥാപകദിനത്തിലാണ് ലാലു ഇതിനു മുൻപ് ആർജെഡി ആസ്ഥാനത്തു വന്നത്.
English Summary: Lalu Yadav organises tremendous road show on CM Nithish's anniversary