പുണെയിലെ ‘അമ്മ’ സിന്ധുതായ് അന്തരിച്ചു

പുണെ∙ മഹാരാഷ്ട്രയിലെ സാമൂഹികപ്രവർത്തകയും പത്മശ്രീ പുരസ്കാര ജേതാവുമായ സിന്ധുതായ് സപ്കൽ (74) അന്തരിച്ചു. പുണെ ഗാലക്സി ഹോസ്പിറ്റലിൽ ഒരു മാസമായി ചികിത്സയിലായിരുന്നു. അമ്മ എന്നർഥമുള്ള മായി എന്നാണ് സിന്ധുതായ് അറിയപ്പെട്ടിരുന്നത്.

പുണെ സൻമതിയിൽ ബാൽ നികേതൻ സൻസ്ഥാ എന്ന അനാഥാലയമുൾപ്പെടെ 6 ബാലസദനങ്ങൾ ഇവർ നടത്തിയിരുന്നു. ഇവിടങ്ങളിലായി 1500ൽ അധികം അനാഥക്കുട്ടികൾക്ക് സിന്ധുതായ് തുണയായി. ഈ വർഷത്തെ പത്മശ്രീ കൂടാതെ 750ൽ അധികം പുരസ്കാരങ്ങൾ സിന്ധുതായ് സപ്കലിനു ലഭിച്ചിട്ടുണ്ട്.

നാരീശക്തി പുരസ്കാരവും ഇതിൽ ഉൾപ്പെടും. അന്തരിച്ച ശ്രീഹരി സപ്കലാണ് ഭർത്താവ്. മകൾ മമത പുണെ മാഞ്ജരിയിലെ ബാലസദനത്തിന്റെ ചുമതല വഹിക്കുന്നു.

വായിക്കാം: ‘രാജ്യം പത്മശ്രീ നൽകി ആദരിച്ച  പോരാട്ടത്തിന്റെ  പെൺജീവിതം’