പഞ്ചാബിൽ ആംആദ്മി എംഎൽഎയുടെ വീട്ടിൽ സിബിഐ റെയ്ഡ്

ന്യൂഡൽഹി ∙ 40 കോടി രൂപയുടെ തട്ടിപ്പുകേസുമായി ബന്ധപ്പെട്ട് പഞ്ചാബിലെ ആം ആദ്മി എംഎൽഎ ജസ്വന്ത് സിങ് ഗജ്ജൻ മജ്രയുടെ വീട്ടിൽ സിബിഐ റെയ്ഡ്. സൻഗ്രൂരിലെ വീട് ഉൾപ്പെടെ 3 ഇടങ്ങളിൽ നടത്തിയ പരിശോധനയിൽ 16.57 ലക്ഷം രൂപ, ഒപ്പിട്ട 94 ബ്ലാങ്ക് ചെക്കുകൾ, ആധാർ കാർഡുകൾ, വിദേശ കറൻസി തുടങ്ങിയവ കണ്ടെടുത്തതായി സിബിഐ വക്താവ് പറഞ്ഞു.

40.92 കോടി രൂപയുടെ തട്ടിപ്പു നടത്തിയ കേസിൽ ബാങ്ക് ഓഫ് ഇന്ത്യയുടെ ലുധിയാന ശാഖ നൽകിയ പരാതിയിലാണ്, ജസ്വന്ത് സിങ്ങിന്റെയും അദ്ദേഹത്തിന്റെ ഉടമസ്ഥതയിലുള്ള 2 സ്ഥാപനങ്ങളുടെയും പേരിൽ കേസെടുത്തത്. 

അമർഗഡിൽ നിന്നുള്ള എംഎൽഎ ആയ ജസ്വന്ത് സിങ്ങാണ് ഈ സ്ഥാപനങ്ങളുടെ ഡയറക്ടർ എന്ന് സിബിഐ പറഞ്ഞു. 2011–14 ൽ 4 തവണയായി സ്ഥാപനത്തിന്റെ പേരിൽ വായ്പയെടുത്ത എംഎൽഎ മറ്റാവശ്യങ്ങൾക്കു പണം ചെലവഴിച്ചതുവഴി ബാങ്കിന് 40.92 കോടിയുടെ നഷ്ടമുണ്ടായെന്നാണ് ആരോപണം.

English Summary: CBI Search At Punjab AAP MLA's Properties