മതവിദ്വേഷം: ഇറാൻ വിദേശകാര്യ മന്ത്രാലയം കുറിപ്പ് പിൻവലിച്ചു
Mail This Article
ന്യൂഡൽഹി ∙ ദേശീയ സുരക്ഷാ ഉപദേഷ്ടാവ് അജിത് ഡോവലുമായി ഇറാൻ വിദേശകാര്യ മന്ത്രി ഹുസൈൻ ആമിർ അബ്ദുല്ലാഹിയാൻ നടത്തിയ ചർച്ചയിൽ പ്രവാചകനെതിരായ പരാമർശം സംബന്ധിച്ചു ചർച്ച ചെയ്തെന്ന കുറിപ്പ് ഇറാൻ വിദേശകാര്യ മന്ത്രാലയം പിൻവലിച്ചു. അവരുടെ വെബ്സൈറ്റിലുണ്ടായിരുന്ന കുറിപ്പാണു പിൻവലിച്ചത്.
ഈ വിഷയത്തെക്കുറിച്ച് അറിയില്ലെന്നും ഇറാൻ കുറിപ്പു പിൻവലിച്ചെന്നും കഴിഞ്ഞ ദിവസം ഇന്ത്യൻ വിദേശകാര്യ വക്താവ് അരിന്ദം ബാഗ്ചി വ്യക്തമാക്കിയിരുന്നു. ആ സമയത്തും കുറിപ്പ് സൈറ്റിലുണ്ടായിരുന്നെങ്കിലും അധികം വൈകാതെ പിൻവലിച്ചു.
പ്രവാചകനെ ഇന്ത്യ ബഹുമാനിക്കുന്നുണ്ടെന്നും ബിജെപി നേതാക്കൾ നടത്തിയ പരാമർശങ്ങൾ മറ്റുള്ളവർക്ക് ഒരു പാഠമായി കണക്കാക്കുന്ന വിധത്തിലാണ് കൈകാര്യം ചെയ്യുന്നതെന്നും ഇന്ത്യൻ നേതാവ് പറഞ്ഞതായി കുറിപ്പിൽ പരാമർശമുണ്ടായിരുന്നു. പരാമർശങ്ങളിൽ ഇറാൻ മന്ത്രി അതീവ ദുഃഖം പ്രകടിപ്പിച്ചതായും ഇന്ത്യയുടെ പാരമ്പര്യത്തിന് യോജിച്ചതല്ലെന്നു മന്ത്രി പറഞ്ഞതായും കുറിപ്പിലുണ്ടായിരുന്നതായാണ് റിപ്പോർട്ടുകൾ.
English Summary: Iran foreign ministry withdraws post