ബൊമ്മെയെ മാറ്റുമെന്ന അഭ്യൂഹം തള്ളി കർണാടക ബിജെപി
Mail This Article
ബെംഗളൂരു ∙ കർണാടക മുഖ്യമന്ത്രി സ്ഥാനത്തു നിന്ന് ബസവരാജ് ബൊമ്മയെ നീക്കുമെന്ന അഭ്യൂഹങ്ങൾ ബിജെപി കേന്ദ്ര, സംസ്ഥാന നേതൃത്വങ്ങൾ തള്ളി. അടുത്ത വർഷത്തെ തിരഞ്ഞെടുപ്പിലേക്കു പാർട്ടിയെ നയിക്കാൻ കൂടുതൽ ശക്തമായ നേതൃത്വം ആവശ്യമുള്ളതിനാൽ ബൊമ്മെയെ മാറ്റുമെന്ന റിപ്പോർട്ടുകളാണു പ്രചരിച്ചത്. അതേസമയം, അദ്ദേഹം കാലാവധി പൂർത്തിയാക്കുമെന്നു പാർട്ടി സംസ്ഥാന പ്രസിഡന്റ് നളിൻ കുമാർ കട്ടീലും മുൻ മുഖ്യമന്ത്രി യെഡിയൂരപ്പയും വ്യക്തമാക്കി.
15ന് മുൻപ് നേതൃമാറ്റം ഉണ്ടായേക്കുമെന്ന് ബിജെപി മുൻ എംഎൽഎ സുരേഷ് ഗൗഡ സൂചിപ്പിച്ചതാണു ചർച്ചകൾക്കു തിരികൊളുത്തിയത്. എംഎൽഎ യത്നലും ഇത് ഏറ്റുപിടിച്ചു. കഴിഞ്ഞയാഴ്ച കേന്ദ്ര ആഭ്യന്തരമന്ത്രി അമിത്ഷാ ബെംഗളൂരുവിലെത്തുക കൂടി ചെയ്തതോടെ അഭ്യൂഹങ്ങൾക്കു ശക്തിയേറിയതോടെയാണു നേതൃത്വത്തിന്റെ വിശദീകരണം. അതേസമയം, പാർട്ടിയിൽ പലകോണുകളിൽ നിന്നും ബൊമ്മെയ്ക്കെതിരെ വിമർശനങ്ങൾ ഉയരുന്നുണ്ട്. കേന്ദ്ര നിർദേശ പ്രകാരം യെഡിയൂരപ്പ രാജിവച്ചതിനു പിന്നാലെ 2021 ജൂലൈയിലാണു അദ്ദേഹം മുഖ്യമന്ത്രിയായത്.
English Summary: Basavaraj Bommai not to be removed from cm post says bjp