പഞ്ചാബിലും മണിപ്പുരിലും ഭീകരാക്രമണ പദ്ധതി തകർത്തു

ശ്രീനഗർ ∙ ഭീകരരുടെ ഗ്രനേഡ് ആക്രമണത്തിൽ ജമ്മു–കശ്മീരിൽ ഒരു പൊലീസ് ഉദ്യോഗസ്ഥൻ വീരമൃത്യു വരിച്ചു. പഞ്ചാബിലും മണിപ്പുരിലും ഭീകരാക്രമണ പദ്ധതികൾ പൊലീസ് പരാജയപ്പെടുത്തി. കശ്മീരിൽ കുൽഗാം ജില്ലയിൽ ഖൈമോയിൽ ശനിയാഴ്ച അർധരാത്രിയോടെ നടന്ന ആക്രമണത്തിൽ താഹിർഖാൻ എന്ന പൊലീസുകാരനാണു വീരമൃത്യു വരിച്ചത്.

പാക്ക് സഹായത്തോടെ പഞ്ചാബിൽ സ്ഫോടനങ്ങൾ നടത്താനുള്ള ശ്രമം പഞ്ചാബ്,ഡൽഹി പൊലീസ് സംയുക്തമായി നടത്തിയ നീക്കത്തിൽ തകർത്തു. 4 പേരെ അറസ്റ്റ് ചെയ്തു. ഗ്രനേഡ്, പിസ്റ്റൾ തുടങ്ങിയവയും ഇവരിൽനിന്നു പിടിച്ചെടുത്തു.

പീപ്പിൾസ് ലിബറേഷൻ ആർമി എന്ന നിരോധിത സംഘടനയുടെ 7 പ്രവർത്തകരെ സ്വാതന്ത്ര്യദിനാഘോഷം അലങ്കോലപ്പെടുത്താൻ പദ്ധതിയിട്ടതിനു മണിപ്പുരിൽ അറസ്റ്റ് ചെയ്തു. ആയുധങ്ങളും പിടിച്ചെടുത്തു. അസം റൈഫിൾസിനു ലഭിച്ച രഹസ്യവിവരത്തെ തുടർന്നു സംസ്ഥാനത്തു നടത്തിയ തിരച്ചിലിലാണ് ഇവർ പിടിയിലായത്.

English Summary: Terrorists attack