ബിൽക്കിസ് ബാനു കൂട്ടമാനഭംഗം: കോടതി ജീവപര്യന്തം ശിക്ഷിച്ച 11 പ്രതികളെ സർക്കാർ മോചിപ്പിച്ചു

ഗോധ്​ര ∙ ബിൽക്കിസ് ബാനു എന്ന യുവതിയെ കൂട്ടം ചേർന്ന് പീഡിപ്പിക്കുകയും അവരുടെ 3 വയസ്സുള്ള കുട്ടി ഉൾപ്പെടെ 7 കുടുംബാംഗങ്ങളെ കൊലപ്പെടുത്തുകയും ചെയ്ത കേസിൽ കോടതി ജീവപര്യന്തം ശിക്ഷിച്ച 11 പ്രതികളെ ഗുജറാത്ത് സർക്കാർ സ്വതന്ത്രരാക്കി. 15 വർഷത്തോളം ജയിലിൽ കഴിഞ്ഞ പ്രതികളുടെ അപേക്ഷ പരിഗണിച്ചാണ് അവരെ മാപ്പുനൽകി വിട്ടയച്ചത്. 

ഗുജറാത്ത് കലാപത്തിനിടെ നടന്ന ക്രൂര സംഭവങ്ങളിലൊന്നിലെ പ്രതികളെ വിട്ടയച്ചതിനെതിരെ വ്യാപകപ്രതിഷേധം ഉയർന്നു. പ്രധാനമന്ത്രി നരേന്ദ്ര മോദിയുടെയും ബിജെപിയുടെയും യഥാർഥ മുഖമാണ് വെളിച്ചത്തുവന്നതെന്ന് കോൺഗ്രസ് ആരോപിച്ചു. കൂട്ടമാനഭംഗക്കേസിലെ 11 പ്രതികളെയും വിട്ടയയ്ക്കാനുള്ള തീരുമാനം ഭയപ്പെടുത്തുന്നതാണെന്ന് ബിൽക്കിസ് ബാനുവിന്റെ ഭർത്താവ് യാക്കൂബ് റസൂൽ പറഞ്ഞു. 

മുംബൈയിലെ സിബിഐ പ്രത്യേക കോടതിയാണ് 2008 ജനുവരി 21ന് ഇവരെ ശിക്ഷിച്ചത്. 15 വർഷം തടവ് പൂർത്തിയാക്കിയെന്നും മോചിപ്പിക്കണമെന്നും ആവശ്യപ്പെട്ട് തടവുകാരിലൊരാൾ സുപ്രീം കോടതിയെ സമീപിച്ചു. വിഷയം പരിഗണിക്കാൻ ഗുജറാത്ത് സർക്കാരിനോട് കോടതി നിർദേശിച്ചു. തുടർന്ന് പഞ്ചമഹൽസ് കലക്ടർ സുജാൽ മായാത്രയുടെ നേതൃത്വത്തിൽ സമിതി രൂപീകരിച്ചു. ഈ സമിതിയുടെ ശുപാർശയുടെ അടിസ്ഥാനത്തിലാണ് സർക്കാരിന്റെ തീരുമാനം.

English Summary: Bilkis Bano Case: All 11 Life Imprisonment Convicts Released