ലീന മരിയ പോളിന്റെ ജാമ്യാപേക്ഷ: ഡൽഹി പൊലീസിന് നോട്ടിസ്

ന്യൂഡൽഹി ∙ സാമ്പത്തിക തട്ടിപ്പു കേസിൽ പ്രതിചേർക്കപ്പെട്ട നടി ലീന മരിയ പോളിന്റെ ജാമ്യാപേക്ഷയിൽ ഡൽഹി ഹൈക്കോടതി പൊലീസിനു നോട്ടിസ് അയച്ചു. സുകാഷ് ചന്ദ്രശേഖർ മുഖ്യപ്രതിയായ 200 കോടി രൂപയുടെ സാമ്പത്തിക തട്ടിപ്പുകേസിൽ ഉൾപ്പെട്ട ഇവർ കഴിഞ്ഞ വർഷം ഓഗസ്റ്റിലാണ് അറസ്റ്റിലായത്. 

അതേസമയം, തട്ടിപ്പു കേസിൽ നടി ജാക്വിലിൻ ഫെർണാണ്ടസിന്റെ വിചാരണ പ്രത്യേക കോടതി 20ലേക്കു മാറ്റി. എൻഫോഴ്സ്മെന്റ് ഡയറക്ടറേറ്റ് റജിസ്റ്റർ ചെയ്ത കേസിലെ കുറ്റപത്രത്തിന്റെ പകർപ്പു ലഭിച്ചിട്ടില്ലെന്നു ജാക്വിലിന്റെ അഭിഭാഷകർ അറിയിച്ചതിനെ തുടർന്നാണിത്. നേരത്തെ ജാക്വിലിനു കോടതി ജാമ്യം അനുവദിച്ചിരുന്നു. 

തട്ടിപ്പുകേസിൽ തന്റെ പേര് വലിച്ചിഴച്ചുവെന്നു കാട്ടി ബോളിവുഡ് നടി നോറ ഫത്തേഹി, നടി ജാക്വിലിൻ ഫെർണാണ്ടസ് ഉൾപ്പെടെയുള്ളവർക്കെതിരെ പരാതി നൽകി. 15 മാധ്യമസ്ഥാപനങ്ങൾക്കെതിരെയും ആരോപണമുന്നയിച്ചു.

English Summary: Notice to Delhi police in Leena Maria Paul bail petition