ഷാങ്ഹായ് സഹകരണ ഓർഗനൈസേഷൻ: ‌ബിലാവൽ ഭൂട്ടോയ്ക്ക് ഇന്ത്യയുടെ ക്ഷണം

ന്യൂഡൽഹി ∙ അടുത്ത മേയിൽ ഇന്ത്യ ആതിഥ്യം വഹിക്കുന്ന ഷാങ്ഹായ് സഹകരണ ഓർഗനൈസേഷൻ യോഗത്തിൽ പങ്കെടുക്കാൻ പാക്കിസ്ഥാൻ വിദേശകാര്യമന്ത്രി ബിലാവൽ ഭൂട്ടോ സർദാരിയെ ഇന്ത്യ ക്ഷണിച്ചു. ബിലാവലിന് ക്ഷണം ലഭിച്ചതായി പാക്കിസ്ഥാൻ സ്ഥിരീകരിച്ചു.

കഴിഞ്ഞ മാസം പ്രധാനമന്ത്രി നരേന്ദ്രമോദിക്കെതിരെ മോശം പരാമർശം നടത്തിയ ബിലാവലിനെ ഇന്ത്യ നിശിതമായി വിമർശിച്ചിരുന്നു. യുഎൻ സുരക്ഷാ സമിതി യോഗത്തിനിടെ ബിലാവൽ നടത്തിയ പരാമർശങ്ങളെ അപരിഷ്കൃതമെന്ന് ഇന്ത്യ വിശേഷിപ്പിച്ചിരുന്നു. 

ചൈന വിദേശകാര്യമന്ത്രി ക്വിൻ ഗാങ്ങിനെയും യോഗത്തിലേക്ക് ക്ഷണിച്ചിട്ടുണ്ട്. അടുത്ത കാലത്ത് ഇന്ത്യ സംഘടിപ്പിച്ച പല രാജ്യാന്തര സമ്മേളനങ്ങളിലേക്കും പാക്കിസ്ഥാനെയും ചൈനയെയും ക്ഷണിക്കാറില്ല. ഷാങ്‌ഹായ് സഹകരണ ഓർഗനൈസേഷനിൽ 8 രാജ്യങ്ങൾ അംഗങ്ങളാണ്. റഷ്യ, കസഖ്സ്ഥാൻ, കിർഗിസ്ഥാൻ, തജിക്കിസ്ഥാൻ, ഉസ്ബക്കിസ്ഥാൻ എന്നിവയാണ് മറ്റ് അംഗങ്ങൾ. 

English Summary: India invites pakistan foreign minister Bilawal Bhutto Zardari to Shanghai Co-operation Organisation (SCO) meeting