കവിതയെ ചോദ്യംചെയ്തത് 9 മണിക്കൂർ; 16നു വീണ്ടും ‌ചോദ്യംചെയ്യും

ന്യൂഡൽഹി ∙ ഡൽഹി മദ്യലൈസൻസ് അഴിമതിയുമായി ബന്ധപ്പെട്ട് ബിആർഎസ് നേതാവും തെലങ്കാന മുഖ്യമന്ത്രി കെ.ചന്ദ്രശേഖര റാവുവിന്റെ മകളുമായ കെ.കവിതയെ എൻഫോഴ്സ്മെന്റ് ‍ഡയറക്ടറേറ്റ് (ഇഡി) 9 മണിക്കൂർ ചോദ്യംചെയ്തു. രാവിലെ 11ന് ആരംഭിച്ച ചോദ്യംചെയ്യൽ രാത്രി 8 വരെ നീണ്ടു.

കേസുമായി ബന്ധപ്പെട്ട് കവിതയുടെ കൂട്ടാളിയും ഹൈദരാബാദിലെ മദ്യവ്യവസായിയുമായ മലയാളി അരുൺ രാമചന്ദ്രൻ പിള്ളയെ ഇഡി അറസ്റ്റ് ചെയ്തിരുന്നു. ഇയാൾക്കൊപ്പമിരുത്തിയാണ് ഇഡി അസി. ഡയറക്ടറുടെ നേതൃത്വത്തിൽ കവിതയെ ചോദ്യംചെയ്തത്. 16നു വീണ്ടും ചോദ്യംചെയ്യും. കവിതയ്ക്കു പിന്തുണയുമായി സഹോദരൻ കെ.ടി.രാമറാവു ഉൾപ്പെടെയുള്ള ബിആർഎസ് നേതാക്കൾ ഡൽഹിയിലെത്തിയിരുന്നു. ബിജെപിക്കെതിരെ തെലങ്കാന ഭവനു മുന്നിൽ ബിആർഎസ് പ്രവർത്തകർ പ്രതിഷേധിച്ചു. 

ഡൽഹിയിൽ സർക്കാരിന്റെ കീഴിലായിരുന്ന മദ്യ വിൽപനയുടെ ലൈസൻസ് 2021 ൽ സ്വകാര്യ മേഖലയ്ക്കു കൈമാറിയതിന്റെ മറവിൽ കോടികളുടെ അഴിമതി നടന്നിട്ടുണ്ടെന്നാണ് ഇഡിയുടെ കണ്ടെത്തൽ. അരുണിന് 30% പങ്കാളിത്തമുള്ള കമ്പനിയാണ് ഡൽഹി മദ്യവിൽപനയ്ക്കുള്ള ലൈസൻസ് നേടിയത്. കമ്പനിയിലുള്ള ഓഹരി പങ്കാളിത്തം യഥാർഥത്തിൽ കവിതയുടേതാണെന്നും അരുണിനെ മുന്നിൽ നിർത്തിയതാണെന്നും ഇഡി സംശയിക്കുന്നു. ലൈസൻസ് ലഭിക്കാൻ 100 കോടി രൂപ ആം ആദ്മി സർക്കാരിന് കവിതയുൾപ്പെട്ട ‘സൗത്ത് ഗ്രൂപ്പ്’  കൈക്കൂലി നൽകിയെന്ന ആരോപണവും പരിശോധിക്കുന്നുണ്ട്.

English Summary: KCR's Daughter Questioned In Delhi Liquor Policy Case, Summoned Again