പങ്കാളിയെ കൊന്ന്; വെട്ടിനുറുക്കി ഫ്ലാറ്റിൽ സൂക്ഷിച്ചയാൾ അറസ്റ്റിൽ

മുംബൈ ∙ ജീവിതപങ്കാളിയെ കൊലപ്പെടുത്തി മൃതദേഹം 20 കഷണങ്ങളാക്കി വെട്ടിനുറുക്കി ഫ്ലാറ്റിൽ സൂക്ഷിച്ച 56 വയസ്സുകാരൻ അറസ്റ്റിലായി. ഒപ്പം താമസിച്ചിരുന്ന സരസ്വതി വൈദ്യയെ (32) കൊലപ്പെടുത്തിയ മനോജ് സാനെ(56) എന്നയാളാണ് അറസ്റ്റിലായത്. 

മീരാറോഡ് ഇൗസ്റ്റിലെ താമസ സമുച്ചയത്തിലെ ഏഴാംനിലയിലാണ് ഇവർ താമസിച്ചിരുന്നത്. ദുർഗന്ധം വന്നതിനെത്തുടർന്ന് അയൽക്കാർ അറിയിച്ചതിനു പിന്നാലെ പൊലീസ് പൂട്ട് തകർത്ത് അകത്തുകയറി പരിശോധിച്ചപ്പോഴാണ് ക്രൂരമായ കൊലപാതകം പുറത്തറിഞ്ഞത്. ശരീരഭാഗങ്ങൾ മുറിച്ച് കവറുകളിലാക്കി ബക്കറ്റുകളിലും വാഷ് ബെയ്സിനിലും അടുക്കളയിലെ സ്റ്റാൻഡിലുമാണ് സൂക്ഷിച്ചിരുന്നത്. കുറച്ചു ഭാഗങ്ങൾ കുക്കറിൽ വേവിച്ച ശേഷമാണ് കവറിലാക്കിയതെന്നും പൊലീസ് പറയുന്നു. സാനെ പതിവില്ലാതെ നായ്ക്കൾക്ക് ഭക്ഷണം കൊടുക്കുന്നതു ശ്രദ്ധയിൽപ്പെട്ടിരുന്നതായും അയൽക്കാർ പൊലീസിനു മൊഴി നൽകി. മൃതദേഹത്തിന് നാലു ദിവസത്തെ പഴക്കമുണ്ടെന്നു പൊലീസ് പറഞ്ഞു. എന്നാൽ, സരസ്വതി വിഷം കഴിച്ച് ജീവനൊടുക്കിയെന്നും അറസ്റ്റ് ഭയന്നാണ് മൃതദേഹം കഷണങ്ങളാക്കി ഉപേക്ഷിക്കാൻ ശ്രമിച്ചതെന്നും പ്രതി മൊഴി നൽകി. 

സാനെ  റേഷൻ കടയിലാണു ജോലി ചെയ്തിരുന്നത്. മാതാപിതാക്കളോ ബന്ധുക്കളോ ഇല്ലാതിരുന്ന സരസ്വതിയെ 15 വർഷം മുമ്പാണ് പരിചയപ്പെട്ടത്.  ഇരുവരും ഒരുമിച്ചായിരുന്നു താമസമെങ്കിലും  കലഹം പതിവായിരുന്നു.

English Summary : Man arrested on killing wife