തെരുവുനായ്ക്കൾക്ക് തുറന്നിട്ട വാതിൽ; മൃഗസ്നേഹം കൈവിടാതെ രത്തൻ

ടാറ്റ ഗ്രൂപ്പിന്റെ ഹെഡ് ഓഫിസായ ബോംബെ ഹൗസിന്റെ വാതിൽ അടച്ചിരുന്നില്ല. തെരുവുനായകൾക്ക് എപ്പോൾ വേണമെങ്കിലും കയറിച്ചെല്ലാം. മുത്തച്ഛൻ ജെആർഡി ടാറ്റയുടെ കാലത്തേ തുടങ്ങിയ മൃഗസ്നേഹം രത്തനും കൈവിട്ടില്ല. ബോംബെ ഹൗസിന്റെ റിസപ്ഷനിലും സെക്യൂരിറ്റി കാബിനിലും അലഞ്ഞുനടക്കുന്ന നായ്ക്കളെ മിക്കപ്പോഴും കാണാമായിരുന്നു.

• Also Read

  ഉപ്പ് മുതൽ ഉരുക്കു വ്യവസായത്തിൽ വരെ ടാറ്റ സ്പർശം; നൂറിലേറെ രാജ്യങ്ങളിലായി പരന്നുകിടക്കുന്ന സാമ്രാജ്യം

ബോംബെ ഹൗസ് പുതുക്കിപ്പണിതപ്പോൾ തെരുവുനായ്ക്കൾക്കായി ഒരു മുറിയൊരുക്കി. കുഷ്യനും മെത്തകളും ഭക്ഷണവും ആരോഗ്യപരിശോധനയും വാക്സിനേഷനും ഒക്കെയുള്ള മുറി. കഴിഞ്ഞ ‍ജൂണിലാണ് അപൂർവരോഗം ബാധിച്ച തെരുവുനായയ്ക്ക് ആവശ്യമായ രക്തം കിട്ടാൻ വേണ്ടി രത്തൻ ടാറ്റ ഇൻസ്റ്റഗ്രാം പോസ്റ്റിലൂടെ മുംബൈ നിവാസികളുടെ സഹായം തേടിയത്. 

കെകെ എന്ന വലംകൈ

രത്തൻ ടാറ്റയുടെ വിശ്വസ്തനായിരുന്നു മലയാളിയായ ആർ.കെ.കൃഷ്ണ കുമാർ. ടാറ്റാവൃത്തങ്ങളിൽ ‘കെകെ’ എന്നാണ് അദ്ദേഹം അറിയപ്പെട്ടിരുന്നത്. യുകെയിലെ ഏറ്റവും പ്രശസ്തമായ തേയില ബ്രാൻഡായ ടെട്‌ലിയെ ടാറ്റ ടീ ഏറ്റെടുത്തപ്പോൾ അതിനു ചുക്കാൻ പിടിച്ചത് കെകെ ആയിരുന്നു. ഇന്ത്യൻ ഹോട്ടൽസിന്റെ വളർച്ചയിലും കെകെ നൽകിയ സംഭാവനകൾ വലുതായിരുന്നു. ലോകത്തിന്റെ വിവിധ ഭാഗങ്ങളിൽ ഹോട്ടലുകൾ വാങ്ങിക്കൂട്ടി. അത്തരം ദൗത്യങ്ങൾ രത്തൻ വിശ്വസിച്ച് ഏൽപിച്ചിരുന്നത് കെകെയെ ആയിരുന്നു. 

രാജൻ നായരുടെ സമരകാഹളം

രത്തൻ ടാറ്റ ടെൽകോയുടെ ചുമതലയേറ്റിട്ട് ആഴ്ചകളേ ആയിരുന്നുള്ളൂ. രാജൻ നായർ എന്ന ട്രേഡ് യൂണിയൻ നേതാവുമായി ബന്ധപ്പെട്ട തൊഴിൽ തർക്കം സമരത്തിലേക്കെത്തി. കാര്യങ്ങൾ കൈവിട്ട് അക്രമത്തിലേക്കു പോകുന്ന സ്ഥിതിയായി. കത്തിക്കുത്തുപോലും ഉണ്ടായി. സമരത്തെത്തുടർന്ന് ഫാക്ടറി നിലച്ചു. പൊലീസ് കാര്യങ്ങൾ നിയന്ത്രിക്കാൻ ശ്രമിച്ചില്ല. രാജൻനായരെ ന്യായീകരിക്കുകയായിരുന്നു പൊലീസ്.

• Also Read

  ഭാരതത്തിന്റെ വ്യവസായ ഭീഷ്മാചാര്യർ; സാധാരണക്കാർക്കൊപ്പം എന്നും എപ്പോഴും

പുണെയിൽ ടാറ്റയുടെ പക്ഷം പറയാൻ ആരും ധൈര്യപ്പെട്ടില്ല. അത്ര കരുത്തനായിരുന്നു രാജൻ നായർ. ലക്ഷങ്ങളുടെ നഷ്ടം വകവയ്ക്കാതെ രത്തൻ ടാറ്റ നിലപാടിൽ ഉറച്ചുനിന്നു. ‘ടെൽകോ ആ പോരാട്ടം ഏറ്റെടുത്തിരുന്നില്ലെങ്കിൽ, വിജയിച്ചിരുന്നില്ലെങ്കിൽ രാജൻ നായർ പുണെ ഭരിക്കുമായിരുന്നു’ – രത്തൻ ടാറ്റ അതേക്കുറിച്ചു പറഞ്ഞു.