‘മോദി പാവങ്ങളെ അവഗണിച്ചു, ഇത് നീതിക്കായി’; ‘വെള്ള ടി ഷർട്ട്’ പ്രസ്ഥാനവുമായി രാഹുൽ, മിസ്ഡ് കോൾ നൽകി ഭാഗമാകാം

ന്യൂഡൽഹി ∙ മോദി സർക്കാരിനെതിരെ ‘വെള്ള ടി ഷർട്ട്’ പ്രസ്ഥാനത്തിനു തുടക്കമിട്ട് ലോക്സഭാ പ്രതിപക്ഷനേതാവ് രാഹുൽ ഗാന്ധി. സാമ്പത്തികവും സാമൂഹികവുമായ അസമത്വത്തിനെതിരെയും മോദി സർക്കാർ പാവങ്ങളെയും തൊഴിലാളികളെയും അവഗണിച്ചതിനെതിരെയുമാണിതെന്നു സമൂഹമാധ്യമത്തിൽ രാഹുൽ കുറിച്ചു.

‘സാമൂഹികനീതിക്കായുള്ള സമരം, എല്ലാത്തരം വേർതിരിവിനെയും തള്ളിക്കളയൽ, രാജ്യത്തു സമാധാനത്തിനും സുസ്ഥിരതയ്ക്കും വേണ്ടിയുള്ള പ്രയത്നം എന്നിവയിൽ നിങ്ങൾക്കു വിശ്വാസമുണ്ടെങ്കിൽ വെള്ള ടി ഷർട്ട് ധരിച്ച് ഈ പ്രസ്ഥാനത്തിൽ പങ്കാളികളാകുക.

സമ്പത്ത് ചിലരിൽ കുന്നുകൂട്ടാനാണു മോദി സർക്കാരിന്റെ ശ്രമം മുഴുവൻ. അസമത്വം വളരാൻ ഇതിടയാക്കുന്നു. രാജ്യത്തിനു വേണ്ടി ചോരയും വിയർപ്പുമൊഴുക്കി പണിയെടുക്കുന്നവർ അനീതിക്കും അക്രമത്തിനും ഇരകളാകുന്നു. അവർക്കു നീതി നൽകാനുള്ളതാണീ പ്രസ്ഥാനം. https://whitetshirt.in/home/hin വഴിയോ 9999812024 എന്ന നമ്പറിൽ മിസ്ഡ്കോൾ നൽകിയോ പ്രസ്ഥാനത്തിൽ ചേരാം.’– രാഹുൽ പറഞ്ഞു.