ഗൗരവ് ഗൊഗോയിയുടെ ഭാര്യയുടെ പാക്ക് ബന്ധം അന്വേഷിക്കും: അസം മുഖ്യമന്ത്രി

ഗുവാഹത്തി ∙ കോൺഗ്രസ് എംപി ഗൗരവ് ഗൊഗോയിയുടെ ഭാര്യയും ബ്രിട്ടിഷ് വനിതയുമായ എലിസബത്ത് കോൾബണിന്റെ പാക്കിസ്ഥാൻ ബന്ധങ്ങളെപ്പറ്റി അന്വേഷിക്കാൻ പ്രത്യേക അന്വേഷണ സംഘം (എസ്ഐടി) രൂപീകരിക്കുന്ന കാര്യം അടുത്ത മന്ത്രിസഭായോഗത്തിൽ ചർച്ച ചെയ്യുമെന്ന് അസം മുഖ്യമന്ത്രി ഹിമന്ത ബിശ്വ ശർമ പറഞ്ഞു. അന്വേഷണത്തിനു ശേഷം വേണ്ടിവന്നാൽ കേസ് റജിസ്റ്റർ ചെയ്യും.

ഗൗരവിന്റെ പിതാവ് തരുൺ ഗൊഗോയ് അസം മുഖ്യമന്ത്രിയായിരിക്കെ പാക്ക് ചാരസംഘടനയായ ഐഎസ്ഐ മുഖ്യമന്ത്രിയുടെ ഓഫിസിലേക്ക് നുഴഞ്ഞുകയറാൻ ശ്രമിച്ചുവെന്ന ആരോപണങ്ങളെപ്പറ്റിയാണ് പരിശോധിക്കുന്നത്.

എലിസബത്ത് കോൾബൺ പാക്കിസ്ഥാനിൽ സന്ദർശനം നടത്തിയിട്ടുണ്ടെന്ന് മുഖ്യമന്ത്രി പറഞ്ഞു. വീസ, പാസ്പോർട്ട് വിവരങ്ങൾ പരിശോധിക്കും. പാക്കിസ്ഥാൻ പ്ലാനിങ് കമ്മിഷന്റെ ഉപദേശകനായ അലി ത​ഖ്​വീർ ഷെയ്ഖും കോൾബണും മുൻ സഹപ്രവർത്തകരായിരുന്നു. ഈ ബന്ധം വ്യക്തമാക്കുന്ന 2019 ലെ സമൂഹമാധ്യമത്തിലെ സ്ക്രീൻ ഷോട്ടും മുഖ്യമന്ത്രി പുറത്തുവിട്ടു. കൂടുതൽ വിവരങ്ങൾ പുറത്തുവരുന്നതായും മുഖ്യമന്ത്രി അവകാശപ്പെട്ടു.