പാക്ക് പൗരനെതിരെ കേസെടുത്ത് അസം പൊലീസ്

ഗുവാഹത്തി ∙ കോൺഗ്രസ് എംപി ഗൗരവ് ഗൊഗോയിയുടെ ഭാര്യ എലിസബത്ത് കോൾബണിന്റെ പാക്കിസ്ഥാൻ ബന്ധങ്ങളെപ്പറ്റിയുള്ള വിവാദങ്ങൾക്കിടെ, പാക്ക് പൗരനെതിരെ അസം പൊലീസ് കേസെടുത്തു. ഇന്ത്യയുടെ ആഭ്യന്തരകാര്യങ്ങളെപ്പറ്റി സമൂഹമാധ്യമങ്ങളിൽ കമന്റിട്ടതിനാണ് അലി തൗഖിർ ഷെയ്ഖിനെതിരെ കേസെന്ന് അസം മുഖ്യമന്ത്രി ഹിമന്ത ബിശ്വ ശർമ പറഞ്ഞു. രാജ്യതാൽപര്യത്തിനും സമുദായ ഐക്യത്തിനും എതിരാണു കമന്റെന്നും ഹിമന്ത പറഞ്ഞു. പാക്ക് പ്ലാനിങ് കമ്മിഷന്റെ ഉപദേശകനായ ഷെയ്ഖും ബ്രിട്ടിഷ് പൗരത്വമുള്ള കോൾബണും മുൻ സഹപ്രവർത്തകരാണ്. ഷെയ്ഖിനെതിരെ കേസെടുക്കാനും മറ്റാർക്കെങ്കിലും ഗൂഢാലോചനയിൽ പങ്കുണ്ടോയെന്ന് അന്വേഷിക്കാനും ഞായറാഴ്ച മന്ത്രിസഭായോഗം തീരുമാനിച്ചിരുന്നു. അപകീർത്തിപ്പെടുത്താനുള്ള ബിജെപി ശ്രമത്തിനെതിരെ നിയമനടപടി സ്വീകരിക്കുമെന്നു ഗൊഗോയി പ്രതികരിച്ചു.