സിനിമാക്കഥ വിശ്വസിച്ച് നിധിതേടി ജനങ്ങൾ; സ്വർണമോ മറ്റോ കിട്ടിയാൽ അതു സർക്കാരിന്റേതായിരിക്കുമെന്നു കലക്ടർ

ഭോപാൽ ∙ വിക്കി കൗശൽ നായകനായ ‘ഛാവ’ സിനിമയിലെ രംഗം യാഥാർഥ്യമാണെന്നു കരുതി മധ്യപ്രദേശിലെ അസീർഗഡ് കോട്ടയ്ക്കു സമീപം ജനങ്ങൾ നിധിതേടി കുഴിക്കാൻ തുടങ്ങി. 15–ാം നൂറ്റാണ്ടിൽ നിർമിച്ച കോട്ടയിൽ മുഗൾഭരണകാലത്ത് സ്വർണം ഒളിപ്പിച്ചിട്ടുണ്ടെന്ന സിനിമാക്കഥ വിശ്വസിച്ചാണ് 2 ദിവസമായി കുഴിക്കൽ.

പ്രദേശത്ത് ആളുകൾ മൊബൈൽ ഫോൺ വെളിച്ചത്തിൽ കുഴിയെടുക്കുന്ന വിഡിയോകൾ സമൂഹമാധ്യമങ്ങളിൽ പ്രത്യക്ഷപ്പെട്ടു. ചിലർ മെറ്റൽ ഡിറ്റക്ടറുകളും മറ്റും ഉപയോഗിക്കുന്നതും ദൃശ്യങ്ങളിലുണ്ട്. സംഭവത്തിൽ ജില്ലാ ഭരണകൂടം അന്വേഷണം തുടങ്ങിയതായും കുഴിക്കുന്നതു തടയാൻ നിർദേശിച്ചതായും ബുർഹാൻപുർ കലക്ടർ ഹർഷ് സിങ് വ്യക്തമാക്കി. സ്വർണമോ മറ്റോ കിട്ടിയാൽ അതു സർക്കാരിന്റേതായിരിക്കുമെന്നും കലക്ടർ പറഞ്ഞു.