കഠ്​വ ഏറ്റുമുട്ടൽ: ഒരു ഭീകരൻ കൂടി കൊല്ലപ്പെട്ടെന്ന് സൂചന

ജമ്മു ∙ ജമ്മു കശ്മീരിലെ കഠ്​വ ജില്ലയിൽ ഏറ്റുമുട്ടലിൽ ഒരു ഭീകരൻ കൂടി കൊല്ലപ്പെട്ടതായി സൂചന. ബില്ലാവർ മേഖലയിലെ രാംകോട്ടിൽ കഴിഞ്ഞ ദിവസം രാത്രി കനത്ത വെടിവയ്പാണ് നടന്നത്. ഒരു ഭീകരനു പരുക്കേറ്റതായും വിവരമുണ്ട്. സുരക്ഷാ സേന ഈ മേഖലയിൽ നടത്തുന്ന തിരച്ചിൽ 10 ദിവസം പിന്നിട്ടു. 2 ഭീകരർ നേരത്തെ കൊല്ലപ്പെട്ടിരുന്നു. 4 പൊലീസുകാരും വീരമൃത്യു വരിച്ചു.

പാക്കിസ്ഥാനിൽ നിന്ന് നുഴഞ്ഞുകയറിയ ജയ്ഷെ മുഹമ്മദ് ഭീകരരാണ് സഫിയാൻ വനമേഖലയിലെത്തിയത്. രാംകോട്ടിൽ 3 പേരുടെ സാന്നിധ്യം കഴിഞ്ഞദിവസം കണ്ടെത്തിയതോടെയാണ് ഇവിടെ തിരച്ചിൽ ഊർജിതമാക്കിയത്. കഴിഞ്ഞദിവസം ഹീരാനഗറിലെ സന്യാൽ ഗ്രാമത്തിൽ ഏറ്റുമുട്ടലിൽ 2 ഭീകരർ കൊല്ലപ്പെട്ടിരുന്നു. 3 പേർ കടന്നുകളഞ്ഞു. ജുതാനയിൽ രാജ്ബഗ് സ്റ്റേഷൻ പരിധിയിൽ ഏറ്റുമുട്ടലിൽ 2 ഭീകരരും കൊല്ലപ്പെട്ടു.