പഹൽഗാം ഭീകരാക്രമണം: ടൂറിസ്റ്റുകളുമായുള്ള ട്രെയിൻ ഇന്നെത്തും

ന്യൂഡൽഹി ∙ പഹൽഗാം ഭീകരാക്രമണത്തെത്തുടർന്നു കുടുങ്ങിപ്പോയ വിനോദസഞ്ചാരികളുമായുള്ള പ്രത്യേക ട്രെയിൻ ഇന്നു രാവിലെ 9.30ന് ന്യൂഡൽഹി സ്റ്റേഷനിലെത്തും. കട്രയിൽനിന്ന് ഇന്നലെ രാത്രി പുറപ്പെട്ട ട്രെയിൻ ഉധംപുർ, ജമ്മു, പഠാൻകോട്ട്, ജലന്തർ, അംബാല, കുരുക്ഷേത്ര, പാനിപ്പത്ത് ‌‌സ്റ്റേഷനുകൾ പിന്നിട്ടാണ് എത്തുക. 

കശ്മീരിൽ കുടുങ്ങിപ്പോയ നൂറോളം യാത്രക്കാരെ ഇന്നലെ പകൽ 3 ട്രെയിനുകളിലായി കയറ്റിവിട്ടിരുന്നു. ജമ്മു തവിയിലും കട്ര സ്റ്റേഷനിലും റെയിൽവേ ഹെൽപ് ഡെസ്കുകൾ തുറന്നു. ‌ ഫോൺ – 0191-2470116, 1072, 01991-234876, 7717306616.