അരുണാചലിലെ സ്ഥലങ്ങൾക്ക് ചൈനീസ് പേര്: അസംബന്ധമെന്ന് ഇന്ത്യ; യാഥാർഥ്യം മാറില്ലെന്ന് വിദേശകാര്യ മന്ത്രാലയം

ന്യൂഡൽഹി ∙ അരുണാചൽ പ്രദേശിലെ ചില സ്ഥലങ്ങൾക്കു പേരുമാറ്റം നടത്തിയ ചൈനയുടെ നടപടി അസംബന്ധമെന്നു വിശേഷിപ്പിച്ച് ഇന്ത്യ തള്ളി. അരുണാചൽ ഇപ്പോഴും ഇന്ത്യയുടെ അവിഭാജ്യ ഘടകമായി തുടരുമെന്നും ഈ യാഥാർഥ്യത്തെ മാറ്റാനാവില്ലെന്നും കേന്ദ്ര വിദേശകാര്യ മന്ത്രാലയം പറഞ്ഞു.  

അരുണാചലിലെ 15 മലകൾ, 2 നദികൾ, ഒരു തടാകം എന്നിവയുൾപ്പെടെ 27 സ്ഥലങ്ങൾക്കു ചൈനീസ് പേരുകൾ നൽകിയ നടപടിയോടാണു കേന്ദ്രസർക്കാരിന്റെ പ്രതികരണം. ചൈനയുടെ ശ്രമങ്ങളെ പൂർണമായും തള്ളിക്കളയുന്നുവെന്നും പേരുമാറ്റം കാരണം യാഥാർഥ്യം മാറുന്നില്ലെന്നും കേന്ദ്ര വിദേശകാര്യ മന്ത്രാലയം വക്താവ് രൺധീർ ജയ്സ്വാൾ പറഞ്ഞു. ഇത് അഞ്ചാം തവണയാണു ചൈന അരുണാചലിലെ സ്ഥലങ്ങൾക്കു പുതിയ പേരു നൽകുന്നത്.