ഒടുവിൽ, യുവ കേന്ദ്രയിലും നെഹ്റു പുറത്ത്!

ന്യൂഡൽഹി∙ അരനൂറ്റാണ്ട് മുൻപു പ്രധാനമന്ത്രി ജവാഹർലാൽ നെഹ്റു സ്ഥാപിച്ച നെഹ്റു യുവ കേന്ദ്ര സംഘതനിന്റെ  (എൻവൈകെഎസ് ) പേരു  മാറ്റം നിലവിൽവന്നു. കേന്ദ്ര യുവജന മന്ത്രാലയത്തിന് കീഴിലുള്ള കേന്ദ്രം ഇനി ‘മേരാ യുവ ഭാരത്’ എന്ന് അറിയപ്പെടും.   2023 ഡിസംബറിൽ പ്രഖ്യാപിച്ച പേരുമാറ്റം വെബ്സൈറ്റിൽ ഉൾപ്പെടെ പ്രാബല്യത്തിലായത് ഇന്നലെയാണ്. ഇതു  സംബന്ധിച്ച് നെഹ്റു യുവകേന്ദ്ര കോർഡിനേറ്റർമാർക്കും നോഡൽ ഓഫിസർമാർക്കും അറിയിപ്പും ലഭിച്ചു. 2023 ഒക്ടോബർ 31നു പ്രധാനമന്ത്രി നരേന്ദ്രമോദി ‘മൈ ഭാരത്’ എന്ന പോർട്ടൽ തുടങ്ങിയിരുന്നു. അന്നു മുതൽ എൻവൈകെഎസിന്റെ  എല്ലാ പരിപാടികളും  ഈ പോർട്ടൽ വഴിയാണ് നടന്നിരുന്നത്. ലോകത്തിലെ ഏറ്റവും വലിയ യുവജന സംഘടനകളിലൊന്നായ നെഹ്‌റു യുവ കേന്ദ്ര സംഘതൻ 1972 ൽ ആണു സ്ഥാപിച്ചത്.