ഫാൽക്കെ ആവാൻ ആമിർ; ബയോപിക് സംവിധാനം ചെയ്യുന്നത് രാജ്കുമാർ ഹിരാനി

ദാദാസാഹേബ് ഫാൽക്കെയുടെ ജീവിതം സിനിമയാക്കാൻ ആമിർ ഖാനും സംവിധായകൻ രാജ്കുമാർ ഹിരാനിയും ഒന്നിക്കുന്നു. 3 ഇഡിയറ്റ്സ്, പി.കെ എന്നീ ചിത്രങ്ങളുടെ വിജയ കൂട്ടുകെട്ടാണിത്. ആമിർ ഖാൻ ചിത്രം സിതാരെ സമീൻ പർ റിലീസ് ചെയ്ത ശേഷം ഒക്ടോബറിൽ ചിത്രീകരണം തുടങ്ങും. 1913 ൽ രാജാ ഹരിശ്ചന്ദ്ര എന്ന ഇന്ത്യയിലെ ആദ്യ ഫീച്ചർ സിനിമയൊരുക്കിയത് ഫാൽക്കെയാണ്. ഇന്ത്യൻ സിനിമയിലെ പരമോന്നത ബഹുമതിയായി ദാദാസാഹേബ് ഫാൽക്കെ അവാർഡ് അദ്ദേഹത്തിന്റെ പേരാണ്. സ്വാതന്ത്യസമരത്തിന്റെ അനിശ്ചിതാവസ്ഥയുടെ കാലത്ത് ഒന്നുമില്ലായ്മയിൽനിന്ന് ഇന്ത്യൻ ചലച്ചിത്രവ്യവസായത്തിനു ജന്മം നൽകിയ മഹാന്റെ ജീവിതം പുതുതലമുറയ്ക്കു പ്രചോദനമാകുമെന്ന് അണിയറ പ്രവർത്തകർ പറയുന്നു. ഫാൽക്കെയുടെ ചെറുമകൻ ചന്ദ്രശേഖർ ശ്രീകൃഷ്ണ പുസാൽക്കർ ചിത്രവുമായി സഹകരിക്കുന്നുണ്ട്.