‘കുട്ടിക്കല്യാണ’ത്തിന് ഇനി മണ്ഡപം കിട്ടില്ല

തിരുവനന്തപുരം ∙ വിവാഹങ്ങൾക്കു മണ്ഡപം ബുക്ക് ചെയ്യുമ്പോൾ വധൂവരന്മാരുടെ പ്രായം തെളിയിക്കുന്ന സർട്ടിഫിക്കറ്റും ഹാജരാക്കണമെന്നു ബാലാവകാശ കമ്മിഷൻ. ശൈശവ വിവാഹങ്ങൾ തടയാനുളള മുൻകരുതലായാണു നിർദേശം. ബുക്ക് ചെയ്യാൻ വരുന്നവരിൽ നിന്നു വധൂവരന്മാരുടെ പ്രായം തെളിയിക്കുന്ന നിയമാനുസൃതരേഖ വിവാഹമണ്ഡപ അധികൃതർ ചോദിച്ചുവാങ്ങണം. ഇതിന്റെ പകർപ്പു മണ്ഡപം ഓഫിസിൽ സൂക്ഷിക്കണം.

പ്രായം കുറവെന്നു കണ്ടാൽ  മണ്ഡപം അനുവദിക്കരുത്. ഒപ്പം, പ്രായപൂർത്തിയാകാത്തവരുടെ വിവാഹത്തിനായി സമീപിച്ചുവെന്ന കാര്യം ഉദ്യോഗസ്ഥരെ അറിയിക്കുകയും വേണം. ഇക്കാര്യത്തിൽ വീഴ്ച ഉണ്ടായാൽ നടപടി സ്വീകരിക്കുമെന്നും കമ്മിഷൻ വ്യക്തമാക്കി.